Lungleiah ‘Lunglei Ni’ hmang
1889 March 4-a Colonel Tregear-a’n “Fort Lungleh” a sak tan ni hriatrengna leh Lungleia cheng thangthar zelten Lunglei hmangaihna thinlung an put zel theihnana ni bik ruahman – ‘Lunglei Ni’ chu Nilaini khan Lunglei Municipal Council huaihawtin C Thuamluaia Mualah a tumkhatna atan hman a ni.
LMC chairman Lalzuithanga chuan, Lunglei Ni chu hlim ni, lawm ni a nih rualin, hlim leh lawm taka hman tawp mai atan erawh a uiawm, tiin, Lunglei chu enge a nih a, Lunglei mipuiin enge an tih theih sang ber tih hmu chhuak tura thawhrim bultanna ni atan, thuthluanga sawrkarin a tihsak tur thlir ringawt loa, mahni thawh chhuah hmanga intodelh dan ngaihtuahna ni atan hmang turin a chah.
Lunglei chu Municipal Council nei, khawpui lian a nih tawh avangin sawrkara innghat pumhlum ngawt loa, mahni thawhrimna hmanga khawpui enkawl a, hmasawnpui tura mawhphurhna pek a nihna hlen tumin LMC chuan theihtawp a chhuah tih a sawi. C Thuamluaia Mual bul chu multi level car parking atan ruahmanin tender chhuah a ni a, a thawktu tur tihfel a ni tawh tih sawiin, Theiriat ram TNT chhakah truck 70–80 vel din theihna Transport Hub cheng nuai 250 vel senga sak tum, Sazaikawnah LMC Complex cheng nuai 400 vel senga sak tum, Ramthar Market pawh tender chhuak mai tawh tura beisei a ni tih a sawi. Saikuti Hall chu cheng nuai 500 senga cheithat tum niin, Finance department-ah executive sanction nghah mek a ni tih a sawi.
Kuminah Lunglei khawpui tan project a tam thei ang ber buaipui an tum tih a sawi bawk.
Lunglei Ni puala intihsiak hrang hrang lawmman sem a ni a. LMC huamchhunga YMA branch hrang hrang telna zaipawlpui-in H Lalringa (L) hla phuah “Leitlangpui a chul dawn lo” tih an rem a. Mizo Cultural Artistes’ Association Lunglei Sub-Hqrs, Higher and Technical Institute Mizoram (HATIM), Govt J Buana College, YMA Rahsiveng Branch leh YMA Chanmari Branch ten hnam lam entirin, Lunglei Govt College-in Mizo hnam thuam chi hrang hrang an entir a. Zaithiamten zaiin mipui kalkhawm an awi a ni.
Tualchhung kutchhuak thuam leh thil leh ei tur zawrhna stall hawn niin, naupang intihhlimna hmun buatsaih a ni bawk. Lunglei Photographers’ Association buatsaih ‘Photo Gallery’ ah thlalak pho chhuah niin, Souvenir Committee buatsaih “Lunglei Ni Souvenir Magazine” leh hriatrengna thil – kawr, lukhum, no, fridge magnet leh a dangte lei theiha chhawp a ni.
Lungleiah ‘Lunglei Ni’ hmang
