Lungrual takin Manipur Meitei leh Kuki MLA te inkawm
Ministry of Home Affairs kaihhruaina hnuaiah thawhlehni khan Manipur a Meitei leh Kuki MLA te chu New Delhi ah inkawmin, Manipur a buaina chhuak reh theih dan tur an ngaihtuah.
Kum khat leh a chanve hnua an inkawm leh hmasak berna niin, Meitei leh Kuki MLA tel tura ruatsa te an tel tha hle niin report chuan a tarlang a, an zingah hian Naga MLA thenkhat an tel ve bawk.
An inkawmnaah hian Manipur a chi leh chi inkara buaina chhuak chungchang chu an thupui ber niin, hnam hnihte hian remna kawng zawha hmalak dun tha an ti ve ve nia sawi a ni.
Darkar hnih chuang thutkhawm hi an nei a, ministry of home affairs lamah hian AK Mishra leh senior officer te tel theiin, union home minister Amit Shah leh Manipur chief minister Biren Singh erawh an tel lo thung.
An thil ngaihtuah ber hi Manipur a buaina chhuak tih reh dan tur a nih miau avangin thil dang vak an sawi lo niin, MHA chuan a sawi a, inpawh taka inkawmna neiin, hnam pahnihte hian an hnam ve vete chungah remna kawnga hmalak an tiam ve ve niin sawi a ni bawk.
Lungrual takin Manipur Meitei leh Kuki MLA te inkawm
