Sawrkar laipuia Ministry of Skill Development & Entrepreneurship (MSDE) leh Indian Institute of Entrepreneurship (IIE) Guwahati tangdunin Indian Institute of Management (IIM) Auditorium Shillong-a an buatsaih “Northeast Skill & Entrepreneurship Conclave 2024” ah Mizoram LESDE minister Lalnghinglova Hmar chu Thawhlehni khan a tel.
Minister of state for MSDE Jayant Chaudhary chu khuallian niin, hmarchhak state hrang hranga Skill & Entrepreneurship changtu minister-te chu khualzahawm an ni a. LESDE minister Lalnghinglova Hmar chuan Mizo thalaiten infiamna, music, hospitality, beauty & wellness, service leh thildangah eizawnna tling thiamna leh theihna an nei tih sawiin, sawrkar laipui hnuaia skill development scheme ah India ram pum hrutrual loin, Mizoram leh Northeast thalaite tuina leh thiam zawng mila kalpui a pawimawh tih a sawi.
State ho chu an thalai leh mipui azira job role thlang a, kalpui turin zalenna zau zawk pek nise tiin a rawt a. Northeast thalaiten theihna sang tak an nei a. An theihna tihmasawn a, hlawhtlinna tluantling an neih theihnan Northeast-ah Skill Training Centre changtlung neih belh pawimawh tih a sawi a ni.
Conclave-a khuallian Jayant Chaudhary chuan India chu ram zau takah ami chengte inang lo tak tak kan nih avangin skill development & entrepreneurship pawh state-te nen inrawn chunga kalpui a ngai tih a sawi a. Northeast state-a Skill Development & Entrepreneurship minister leh official-te thathona, inpekna leh idea tha tak tak chuan chona a pek thu a sawi. Industrial Training Institute chu skill inzirtirna pawimawh an nih avangin India sawrkarin a ngaipawimawh a, ITI 1000 tihchangtlunna tur kalpui mek a ni tih a sawi.
LESDE secretary Lalmalsawma Pachuau chuan Mizoram aiawhin powerpoint presentation a pe a. Mizo thalaiten kutthemthiam kawngah theihna sang tak an nei a. Kumin kumtira IndiaSkills Competition neihah Mizoramin medal pali leh Medallion of Excellence pali a la a, medal leh medallion latu zinga panga chu ITI leh Women Polytechnic chhuak an ni tih a sawi.
Conclave-ah hian MSDE director Pritam Dutta chuan powerpoint presentation hmangin hmarchhaka an ministry hmalakna hrang hrang a sawi a. NE state 8 atangin an state theuha skill development leh entrepreneurship dinhmun tlangpui leh hmathlir sawi a ni.
Mahni kutkea eizawnna lam hawi hmalakna tur rawtna sawikhawm
