Middle East huam chhunga indona chhuak avangin kumin Formula One world championship calendar-a chuang Bahrain Grand Prix chu season tir lam khan thulh ni mah se Arab race hi Malaysia rama tlan turin ruahmanna siam a ni a, a hun atan October thla tir lam tinzawn a ni.
Malaysia rama tlan tur Bahrain race hi Kuala Lumpur kiang hnaia Sepang track-a tlan tur niin, kum 2017 kha calendar-a he tlankawng lan tawpna ni tawhin, kuminah Sepang an luah leh dawn niin a lang a, October ni 2-4 khi tinzawn niin, Bahrain Grand Prix tih a la ni tho dawn a, Pathianni hian official-a an puan chian hman rin a ni.
Chawlhkar khat hnuah Malaysia thenawm Singapore-in grand prix a thleng chhunzawm ve nghal dawn a ni.
He ruahmanna kal mek hi Formula 1 lam ruahman niin, contract ziah dan pangngaia kalpui a nih loh bakah motorsports lam thuneitu sang ber FIA lam pawh a relna lamah hian an inrawlh lo.
Bahrain leh Saudi Arabia chu kumin April thla khan race dawl tur ve ve ni mah se USA leh Israel tangdunin Iran an beih avangin March thla khan he ram pahniha grand prix tlan tur hi an thulh a ni.
Malaysia rama race an tinzawn mek hi an nemngheh hunah chuan a zawnin Azerbaijan, Malaysia leh Singapore lamah race vawi thum an tlan dawn tihna a ni a, F1 team leh driver-te an rim deuh dawn a nih hmel.
Malaysia ram daih daihah Bahrain race an tlan dawn!
