Mipui nitin mamawh phurtu truck-te engemaw avanga an hna a chatlak palhin mipui nunphung a nghawng nasa thin hle tih PWD minister Vanlalhlana chuan a sawi a. Sawrkarin kawngpui siamtha turin hma a la zel tih a sawi bawk.
Nilainia Bawngkawn-a Mizoram Truck Owners’ Association office thar a hawnnaah Transport minister ni bawk Vanlalhlana chuan, bungrua, a bikin essential commodities chu chatlak loa a hun taka a thlen a pawimawh hle a, engemaw vanga an hna a chatlak palh thinna chuan mipui nitin nunphung a nghawng nasa thin hle tih a sawi.
Sawrkarin truck neitu leh khalhtute harsatna a hrereng tih sawiin, Kawnpui leh Khamrang inkar kawngpui pawh NHIDCL kutah awm tawh mah se PWD-in a vilpui thin a. Khawthlang lama an mutan, NH-44A hna hmabak chu ministry-in cheng vaibelchhe 134 a rawn sanction tawh a, tunah tender chhuah mek tih a sawi. He kawng atana ‘one time improvement’ thawhna tur cheng vaibelchhe 48 pawh Ministry of Road Transport & Highways Regional office-ah a inchiah mek tih a sawi a ni.
Aizawl leh Lunglei inkalpawhna ATL Road pawh hna thawh tan theih a nih phat atangin official-ten hma an la nghal a, Lunglei khawpui chhung kawngpui chu Krismas hmaa blacktop tum a ni, tiin, Aizawl khawchhung resurfacing kalpui mek chu nakkum March tawp lama zawh theih beisei a ni tih a sawi.
“Supreme Court atangin a khat tawkin thil tih tihhlawhtlin tur ruahmanna an rawn siam thin a. Tunah pawh speed limiting device vuah vek turin a rawn ti a. Hei bakah hian Transport department hmalaknain weighbridge hmangin bungraw phur truck buk thin a ni a, phurrita la mai loin, kan him tlanna tur zawk, kan kawngpui a tlo zawkna tur a ni tih hria ang u,” minister hian a ti.
Mamawh phurtu chatlak palh a pawi Kawng siamtha turin hma kan la zel: – PWD minister
