Mamit District Hospital building tih len hna chu zawh niin a satu Zamzo Engineering Construction & Consultancy chuan Mizoram sawrkar hnenah Nilaini khan a hlan.
Zamzo Engineering Construction & Consultancy neitu Ronnie Zolianngura report danin, he project hi Power Finance Corporation Ltd. (PFC) New Delhi corporate social responsibility fund leh Mizoram sawrkar atangin 70:30 a inchawisema thawh a ni a, cheng vaibelchhe 17.934 sen a ni. Mamit Hospital hi chhawng 5-a sang niin, a zau zawng square metre 4240.78 a ni. Inremna thu (MoA) hi 2020 March 6 khan thlun fel a ni a, Covid hrilengin a nghawng lockdown avang leh building design siam danglam a ngaih avangin project hunbi tlai deuh mah se, hna zawhfel a ni a, completion certificate hi 2025 May 2 khan pek an ni.
He project hian hospital-a khum 30 awm sa atangin khum 100 nei IPD Block thar siam a ni a. Mamit district mipui tan quality tha zawka secondary healthcare service pek, nu leh nau enkawlna, emergency service, operation theatre, laboratory, imaging leh medical service hrang hrang a huam tel a ni.
Inhlanna hriatpuitu Health & Family Welfare minister Lalrinpuii chuan, sawrkar hmasa lamah hospital building tihlenna turin MoA ziah a ni a. PFC New Delhi CSR fund hmanga he project hi kalpui niin, kum hmasa lamah sum an dawn kim loh avangin sak zawh a ni loa, inhlanchhawn a la rem lo tih a sawi. tunah chuan Hospital IPD Block hi sak zawh ni tawhin, inhlanchhawn theih a ni ta tih a sawi a ni.
Mamit Hospital sak thar inhlan fel
