Manchester City an chak zel

Inrinni zan khan English Premier League 2026-27 khelh chhunzawm a ni a, table chung ber luahtu Manchester City chak zelin an mikhual Ipswich Town chu 3-2 in an hneh. Inrinni zana inkhel dangah team lian Chelsea leh Liverpool ten hnehna an chang ve bawk.
Dal theih loh
Erling Haaland
EPL season kal meka la chak vek Manchester City hian EPL club thar Ipswich Town lakah bul an tan tha viua naa an tawlhthlu ve teuh viau tho. City tan Club leh ram tana goal thun reng mai Erling Haaland bawk a langsar a, goal hnih a thun. An muala chak City hian table chung ber an luah nghet deuh deuh zel.
City tan hian Phil Foden chuan inkhel tan atanga minute 19-naah hmahruaina goal a thun. Hma takah goal thun mahse City an phur rei thei bik lova goal an chhuah ve thuai. Ipswich Town tan hian Daizen Maeda chuan minute 21-naah goal thunin an si phurh a sut.
Hma takah goal hnih a lut hian inkhel a tihmuhnawm leh zual hle a, goal thun tumin an innawr tawn nasa hle. City tan hian Erling Haaland chuan minute 34-naah hma an hruai nawn lehna goal a thun a, 2-1 a hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, City tan Haaland chuan minute 69-naah an goal thumna a thun zui leh a, City hmahruaina a tizau lehzual. An mualah 3-1 a hma an hruai vangin City dinhmun a tha viau tawh a, chak ngei tura ngaih an ni hman. Si hnih phur tawh mahse Ipswich Town in minute 90-naah penalty an hmu. Penalty hi Zian Flemming chuan pet goal in, an inkar a zim nawn leh. Hun tawo dawn hnaiah goal an chhuah vangin City dinhmun derthawng thar leh bawk mahse goal an chhuah belh lovin an him tluan a, point thum an hmuh belh leh.
Chelsea leh Liverpool an chak
Inrinni zana inkhel dangah team lian Chelsea leh Liverpool ten hnehna changin point thum an hmuh belh ve bawk.
London club lian Chelsea chu Everton hmachhawn turin Hill Dickinson Stadium-ah an lenglut a, mikhual an nihna hmunah Pedro Neto goal hnih thun hmangin hnehna an chang.
Chawlhlawk hmaa goal lut awm theih lohna inkhelah hian Chawlhlawk hnu lamah Chelsea an hr^ng leh zual a, goal hnih an thun. Second-half tirte minute 46-na lekah Pedro Neto chuan hmahruaina goal a thun a. Goal a luh belh theih loh reng hnuin Neto bawk hian minute 90-naahan goal hnihna a thun belh zui leh a, 2-0 in an chak zui ta a ni.
Mimualah Chelsea an chak rualin Liverpool pawhin mikhual an nihna hmunah 2-1 in Brentford an lehthal a, hnehna an chang ve bawk. Si an phurh hnuin Reds tan hian Víctor Muñoz leh Alexander Isak ten goal an thun.