Manifesto 80% vel kan tihlawhtling – Lalruatkima

MNF party chuan an manifesto zinga zaa 80 vel an tihlawhtling a, ‘distinction’ ah an pass tih MNF adviser Lalruatkima chuan a sawi.
MNF Media & Publicity chairman ni bawk Lalruatkima chuan, MNF chuan an manifesto siam hi an ti mai mai loa, ram leh hnam tana tha tur uluk taka zirchiang chungin an duang a. An sawrkar hnu pawhin party leh minister-ten an manifesto bu keu chungin ram hruai hna an thawk a. Pathian zarah an tihlawhtling tam a, dan an siamtha tam a, dan thar pawh an siam tam tih a sawi.
“Min beitute hian hrechiang lo leh zirchiang loin min bei thin a, tawngkam an thiam si a, an sawi tam bawk si a, tak tak emaw lo ti tawk tam tak an awm a ni. Kan manifesto-ah hian hmalak miah lohna kan nei lo hialin kan hria a, chuti chung chuan tihhlawhtlin nghal rum rum theih loh chi a awm a, chu’ngte chu kumin inthlan manifesto-ah hian kan telh zui leh a ni,” a ti.
An manifesto chu zaa 80 vel chu an tihlawhtlingin an hria tih sawiin, “Kan tihhlawhtlin rih lohte pawh nasa taka hma kan lak mekna te a ni hlawm a. Kan titha thawkhat hle a, distinction-ah kan pass-in kan hria,” Lalruatkima hian a ti.
An manifesto-a tel lo, chief minister vision nei, ram siam kawnga ngaihtuahna nasa tak sengin a vei em em thildang a sawi nual tih a sawi a. Kawngchhawng siam, leiverh leh a dangte ah pawh hmalakna kalpui mek zel a ni tih a sawi.
“Leiverh liantham tak siam turin DPR peihfel a ni tawh a, tender tihchhuah tawh a ni. Kawngchhawng pawh Aizawl hmun hnih – Vaivakawn leh Bawngkawnah siam tum niin, mithiamte pawhin an rawn en fo tawh a, hrileng avang bakah thil liantham tak a nih avangin tum angin thil a kal rih mai lo a ni,” MNF adviser hian a ti.
Pathian leh mipui khawngaihna changa MNF an sawrkar leh a nih chuan, ram leh hnam tan hnathawh zawh loh tam tak an la nei a. Tha tho tak leh taima takin an thawk zui dawn tih a sawi.
“Kan hmalakna tlangpui zawr zawr en pawh hian kan thawk tha thawkhat hle tih a lang a. MNF sawrkar hi ngawirenga hna thawk mawp mawp mai thin, inpuangzar vak vak lo kan nih avangin, kan hmalakna tam tak hi mipui hian an hre tawk lo a. Hna thawk mang loa min puhna pawh thutaka lo ngai tawk an awm thin,” a ti. Pathian leh mipui zarah MNF hian sawrkarna an chang leh ngeiin an ring a, boruak zalen leh pangngai hnuaiah nasa lehzualin mipui rawng an bawl thei ngei ang tih an beisei tih a sawi a ni.