Political party dangte chuan manifesto mumal an nei lo emaw tih mai turin ZPM beih chu hnapui ber ah an nei tih ZPM president Lalliansawta chuan a sawi.
Thawhtannia Lengteng bial Dulte khuaa street campaign a hmanpuinaah ZPM president chuan ZPM thli a tleh mek a, kum 2018 ai khan vawiinah chuan ZPM chu miten an chezia leh an thiltih reng rengah rinna an nghat chho zel, tiin, “Hei hi Pathian malsawmna a ni. Party dangte hian manifesto mumal an neilo emaw tih mai turin ZPM beih ringawt mai hi an hnapui a ni ber,” a ti.
Kan ram hmasawnna kal hleihtheih loh chhan ber chu corruption a ni tih Lalliansawta hian a sawi. “Hei hian Mizote moral a ei chhe nasa em em a. Mizoram budget chu mipui ta a ni a, party bil ta emaw mimal tute emaw pum puarna tur bik atana ruahman a ni lo. Kan zavai atan rualkhai taka hma kan sawn theihna atana ruahman a ni,” a ti.
Campaign-naah thu an sawiin party dang leh sawrkar lai mek thil tih dan leh kalphung sawilan loh theih loh chang a tam a, chu chu thenkhatin midang sawichhia angten sawi leh thin mah se, sawrkar kalphung dik tawk lote mipui hnena hriattir chu opossition party-te tih tur a ni tlat tih a sawi a ni.
Manifesto mumal an nei lo emaw tih turin ZPM min bei – Lalliansawta
