Manipur-a hel inkahnaah panga vel thi

Manipur-a hel inkahnaah panga vel thi
Manipur-a Noney district, Longpi bula Deiveijang khaw ram ngawa Thawhlehni tuka tun hnaia Chin-Kuki hel pawl pahnih indin thar inbeihnaah hel panga vel an thi niin thuneituten an sawi.
Police hotu chuan inkahna hi Nungba Police Station chhim lam km 50 vela hla, ramngaw chhah takah a ni tih a sawi a. “Lirthei pawh a lut lo va, mobile signal a awm lo bawk a. Thil thleng kimchang kan la hre thei lo va, police team erawh tirh nghal an ni,” a ti.
Inbei pahnihte hi United Kuki National Army (UKNA) leh Chin Kuki Mizo Army (CKMA) an ni a, sorkar laipui nena Suspension of Operations (SoO) inremna ziaktu pawla tel lo ve ve an ni.
Thite hi an hming pawh an hre tawh a; mahse, khawi lam pawl zawka mite nge tih erawh an la hre thei lo.
“UKNA leh CKMA hi tun hnaia indin thar, Chin-Kuki hnama ralthuam keng an ni a. Manipur tlangram district zawng zawngah che velin Indo-Myanmar ramri hnaihah pawh an inzar pharh,” tiin an chanchin hria pakhat chuan a sawi.
Thuneitute chuan an pawl inkara inepna leh ram chin inchuhna avanga inbei an nih a rinawm thu an sawi.
“SoO ziak ve lo pawlte inkarah hian ram inchuhna a nasa hle a. UKNA nia hriatten June 30-a Kuki National Army (KNA) deputy commander-in-chief an thah atang phei kha chuan pawl inepna boruak hi a lian zual,” tiin officer chuan a sawi.
SoO ziaktu zinga mi, KNA-a an hruaitu hi UKNA mite ni ngeia hriatten an kap hlum a, Chin-Kuki hel pawl hrang hrang inkarah inepna a lian zel.
Venhim hna thawktuten thlithlaiin an che vel pawh an chhui zui reng chungin Manipur Police emaw, central paramilitary force emaw pawhin he inthahna thlengah hian thil chinchang an la hre kim rih lo.
Thawhlehni zan thleng khan Deiveijang khua leh a chhehvelah hian boruak a la tang hle a ni.