Manipur-a Zofate ralmuang deuh rih

Kumin chu Manipur-a Zofate an buai let tawp
tawp a ni ber a, tun hnaiah erawh an ralmuang rih ta deuh. An ralmuang rih a, ni tin khawsak lamah pawh an harsa ta lo deuh tih thu dawn a ni.
Zofate leh Meitei an indo avangin thil a chawl thuap a, khawlaia chhuah ngam loh khawpin an awm deuh reng. Tunah chuan kohhran an inkhawm thei a, zirna inte an hawng tawh bawk. Inkah bur bur a awm rih lo a, chanchin lawmawm lo hriat tur a hma angin a awm ta lo deuh bawk.
Buaina tuar nasa bera ngaih, Zofate awmna Kangpokpi district-ah zirna in an hawng tawh a, kohhranhote’n biak inah hun an hmang pangngai thei tawh bawk. Kangpokpi-ah pawh Saikul sub division-in an tuar nasa a, anni pawh an ralmuang rih.
Churachandpur district-ah pawh zirna in an hawng a, kohhranin a hun pangngaiah hun an hmang thei tawh bawk. Sorkar office erawh a hmingin an inhawng ve nia sawi a ni.
Anni hian raltlan mi 40000 vel an la enkawl a, sikula awmtir te an nih nawk avangin sikul thenkhatah chuan sikul kal hun hi siamrem a la ngai.
Chandel district pawh an ralmuang rih a, he district-a Sugnu khua leh a chhehvelte chu hun engemaw chen kha buai nasatna a ni thin a, tunah chuan an ralmuang tih thu dawn a ni.
Tengnoupal district-a Zo hnahthlakte a la nghawng a, Moreh vel an la buai avangin sorkarin curfew a la puang.
An ralmuang rih na a, Zo hnahthlakte’n mahni khua an la veng a, duty-na hmun siamin chhun zan zawmin thalai an la duty reng. Mahni khua leh ram veng tur hian training pawh an la inpe chhunzawm reng bawk.
Thu dawn danin, Manipur-a Zo hnahthlak, buai vanga nunna chan hi an hriat theih chinah mi 152 an ni.