Manipur-ah ralthuam thahnem tak man
Indian Army bakah Assam Rifles, Manipur Police leh venhim hna thawktu pawl dangten beihpui an thlaknaah Manipur-ah ralthuam leh indonaa hman chi thil chi hrang 35 an man a. Heng thilte hi tlangram leh phaizawla Thoubal, Tengnoupal, Bishnupur, Churchandpur, Imphal West, Noney, Jidribam leh Kakching-a an mante an ni.
An thudawn bawhzuiin Bishnupur district-a Bungte Chiru khaw hmar lam, Lungkhongjang-ah modified sniper rifle, 9 mm pistol panga, single barrel rifle pahnih, grenade, silaimu leh indona chi thil tam tak an man.
Indian Army hian an thudawn bawhzui bawkin Bishnupur leh Churachandpur district inrina, Dampi Ridge leh Khuga lui bulah CRPF leh Manipur Police tangkawmte nen 9mm Sub Machine Gun, .303 rifle, pistol, single barrel breach loaded gun, tualchher mortar, grenade launcher, grenade leh thil dang an man.
Tengnoupal district-ah Assam Rifles chuan an thudawn bawhzuiin kar kalta Thawhtanni khan Indo-Myanmar Border bula Yangoupokpi-ah ramri kân ruk tum hel akhat an man a. Thu an zawhna atangin Kanglei Yawol Kanna Lup (KYKL) pawla mi a ni tih hriat a ni.
Kar hmasa Thawhtanni vek khan Assam Rifles hian an thudawn bawhzuiin Maohing, Noney district-a ralthuam an dapnaah 9mm tualchher pistol, .303 rifle, improvised projectile launcher, grenade, silaimu leh indona thil an man bawk.
Ningani khan Assam Rifles leh Manipur Police chuan an thudawn angin Ngamukhong Fungi Ching (Leingangpokpi), Thoubal district an dapnaah tualchher pistol, single-bore tualchher rifle, No. 36 hand grenade 10, silaimu leh indona thil thahnem tak an man.
Hemi ni vek hian Assam Rifles, Manipur Police leh Commando Team chuan Heirok leh Wangjing, Thoubal district-a an chetnaah KCP (PWG) hel pahnih leh 9mm pistol pahnih, silaimu leh indona hmanrua an man.
Hemi ni tho hian Jiribam district-a Zairawn leh Uchatol khuaah Assam Rifles leh Manipur Police chuan beihpui thlakin carbine, single barrel gun, grenade leh silaimu an hai chhuak.
Chandel district-ah Zirtawpni khan Assam Rifles-in Gamngai leh Pheijang inkar an dapnaah 9mm pistol, tualchher mortar (pompi), Improvised Explosive Device (IED (1 kg vel), grenade, silaimu leh indona hmanrua an hai chhuak.
Zitawpniah vek hian Assam Rifles leh police tanghovin Potsangbam Khullen Hill Range, Imphal West district an dapnaah self-loading rifle, carbine machine gun, .32 caliber tualchhe pistol, 51mm mortar pahnih, grenade leh silaimu an hai chhuak.
Inrinnia Thangjao Mamang Ching, Kakching district-ah Assam Rifles leh police ten beihpui an thlaknaah .303 Sniper Rifle tihdanglam, airgun rifle, grenade, silaimu leh indona thil tam tak an man.
Hemi ni vek hian Imphal West district-ah Assam Rifles leh police tangdun chuan Sekmai (Tendongyan) an dapnaah .303 rifle, 9mm pistol, .32 caliber pistol, hand grenade leh silaimu an dap chhuak.
Mihring man leh ralthuam mante hi chhui zui turin Manipur police kutah hlan vek a ni.
Manipur-ah ralthuam thahnem tak man
