Manipur atanga raltlan a hma aiin tlem

Manipur aTangin Mizoramah Zo hnahthlakte an
raltlan a, kum tawp lamah hian an pung lo mai ni lovin Mizorama awm an tlem telh telh.
Home department-in an chhinchhiah danin, October ni 26-ah khan Mizoramah Manipur aTanga raltlan hi mi 11991 an awm a, hemi hnu hian an pung lo.
December ni 15, kar hmasa Zirtawpni khan Manipur aTanga raltlan hi mi 11348 an awm tiin home department hian an chhinchhiah a, hemi hnu pawh hian an tlem telh telh tih thu dawn a ni.
Thu dawn danin, October thla tawp lam leh November thla tir lamah khan inthlan buaipui a ngaih avangin raltlante lo chhinchhiahtu bawrhsap office hrang hrangin a hma angin raltlan zat hi an chhinchhiah uluk thei lo a, inthlan hnua an tih That lehin a hma aiin an lo tlem a ni.
May ni 3-ah khan Manipur-ah Zo hnahthlakte leh Meitei an intibuai a, hemi hnu hian ralthuam hmangin an inbei zui a, hei vang hian mi sing chuang Mizoramah an raltlan a ni.
Tun hnaiah Manipur boruak a ralmuang ta deuh a, a hma angin an tlanchhuak sup sup tawh lo. Raltlan thar an tam tak loh bakah raltlan zingah hian mahni in leh lo awmnaa kir leh an awm nual bawk. Hei vang hian Manipur aTanga Mizorama raltlan zat hi a tlahniam a ni.
Manipur-a Zo hnahthlakte leh Meitei-te hi tih tak zeta indo an ni a, mahse tun hnaiah a hma anga inkah bur bur a awm ta lo. An boruak a ralmuang ta deuh a, Zo hnahthlakte lamah zirna in leh biak inte pawh an hawng leh tawh.
Manipur aTanga thu dawn danin, Zo hnahthlakte’n a hma angin ngawrh takin mahni khua an veng tawh rih lo a, mahse a hma tawnga awm, Meitei nena inhnaih deuh khuate chu an la ‘duty’ zel.