Manipur buai chamah PM Modi khawngaihna nei lovah puh

Congress te chuan May 3 khan Narendra Modi sorkar chu Manipur thil thleng vangin nataka beiin khawngaihna nei lo leh inchhirna pawh nei lo an ti.
Congress president Mallikarjun Kharge chuan kum khat kalta May 3, 2023 khan Manipur chuan buaina a tawk tan a ni a ti a.
“Manipur-ah mihring mihrinna a kehchhia a. Khawngaihna nei lo Modi sorkar leh nikhualo BJP state sorkar te tangkawp chuan state chu hmun hnihah a then hrang a ni. Inchhirna pawh nei lo PM Modi chuan Manipur state tlawh pawh a la tlawh duh lo va, chu chuan a laktlaklohna leh thleibik a neihna a lantir bawk. A invaivungna chuan Manipur state social fabric a tichhe tawh a ni” tiin a sawi.
Kharge chuan Manipur mipui te community tin te chuan BJP tena an nun an tihbuai dan an hrefiah tawh a ti bawk a.
“Northeast mipuite chuan Modi sorkarin zahna nei hauh lova development an aupui chuan helai region-ah humanity a tichuai tih an hre tawh a ni. India mipuite chuan tunah chuan PM Modi leh a sorkar chuan Manipur a nunna tam tak an tihchhiat tawhah lainatna an nei lo tih an hrefiah tawh” tiin Congress chief chuan a sawi bawk.
Manipur buaina avangin mi 220 chuangin nunna an chan tawh a, mi 60,000 chuang chenna in leh lo chhuahsanin an awm tawh a, hmeichhia leh naupangte chu camp hrang hrangah hrehawm takin an awm mek a ni.
“Hmeichhiate pawngsual an ni a, saruaka kaltir niin tharumthawhna rapthlak a thleng chungin PM ber a la ngawi kar a. Thinrimna nasa tak thlen hnuah PM chuan August 2023 ah tawngkam a nei ve chauh a ni” tiin Kharge chuan a sawi bawk.
Security personnel ten nunna an chan a. Police te train community pahnih te an inbei a, ralthuam te rukin a awm bawk, tiin Kharge chuan a saiw bawk a. January thlaah khan armed group te chuan kan MP/MLA te Kangla Fort a meeting nei turin an turlui a, IMC Manipur President phei chuan sawisak a tawk a ni, a ti bawk.
Manipur-ah sorkar a awm pawhin a lang lo va, law and order a tluchhia a ni a ti bawk a. “Hrehawm ti takin tharumthawhna rapthlak tak tuar leh pawisawilo nunna chan te kan sun a, remna a awm leh ngei theih nana beiseina la nei tang tang te kan thlawp bawk.” tiin a sawi a.
“BJP te avangin Manipur atangin remna leh muanna a bo a ni” tiin Congress president chuan a sawi bawk a. Eng vanga Modi sorkar leh prime minister ber pawh ngawi reng nge a nih zawhna a siam bawk.
Congress general secretary Jairam Ramesh pawhin prime minister chu Manipur mipuite hnuchhawn tia puhin Manipur enkawl chu Home Minister kutah dahin ani lah chu ‘hmantlakloh, ngaihtuah lo leh laktlak loh’ a ti bawk a.
“Kum khat kalta khan Manipur a buai tan a, dik taka sawi zawk chuan rorel lai BJP te mi thendarh policy avanga buai a ni” tiin Ramesh chuan a sawi.
“Mi za telin nunna an chan tawh a, mi sang telin in leh lo an chan a, Manipur community te chu inringhlel reng rengin an awm tawh a ni. Security forces te meuh phwin beih an tawk chamchi a, militia te zawk chuan official te thlawpna an dawng hlauh zawk” a ti bawk.
Civil war ang mai a nih laiin prime minister chuan ngawih a chuh tlat ti bawkin Ramesh chuan Modi chuan Assam, Tripura leh Arunachal Pradesh te campaign a a tlawh chungin Manipur chu minute reilote awm tur pawhin a tlawh duh lo a ti bawk.
Congress leader chuan tuna Manipur dinhmun mek chu Modi sorkar in ‘Bluff and Rule’ policy an kalpui vang tia sawiin chu chu Northeast pumah an kalpui mek a ni a ti bawk.