Kumin May thla tira Manipur-a Zohnahthlak leh Meitei inkara buaina chhuak kaihhnawihah Zohnahthlak mi 151-in nunna an chan tawh a, he buaina avanga an in tlanchhuah san mek midang 42-in natna leh thildang vangin nunna an chan tawh bawk.
May 3 atanga Manipura chi leh chi inkar buaina kalzelah Manipura Zohnahthlak awmte inkara inunauna tha lehzual a awm theih nana kumin September 6-a Aizawla hnam hrang hrang hruaitu kalkhawmten an din, Zo United hruaitute chuan Ningani khan Mizoram NGO Coordination Committee an kawm a. Heta an report danin, November 9 thlenga chhinchhiah chinah Manipur buaina avang hian Zohnahthlak khua 203 halsak an ni tawh a, chenna in 8166 hal sak an ni tawh. Heng mite tana awm lailawkna tur (relief camp) 200 siam a ni a, chenna in nei loa awm (displaced people) chu mi 50000 chuang an ni tawh. Buaina avanga nunna chan mi 151 an tling tawh a, relief camp-a awm mi 42-in nunna an chan tawh bawk.
Zo United hruaitute chuan kawng engkima anmahni tanpui a, an hnung dawmsak tlattu, Mizorama Mizo mipui chungah lawmthu an sawi a, theihtawpa tanpui zel tur leh an hmelmate laka tangho zel turin Mizo mipui leh NGO hruaitute an ngen tih an sawi. An convener Albert Renthlei-in a ho a, co-convener Ch Ajang Khongsai leh secretary Rev Dr Vanlalnghakthang bakah hruaitu mi 23 an tel.
NGO Coordination Committee hruaitute hi an chairman, Central YMA president Lalhmachhuana’n a hoa a, Zohnahthlak unaute tawrhna chu a tawp mai dawn loa a lan avangin kawng engkimah fei a ngai, tiin, teirei peiha pawl kaihruai turin Zo United hruaitute a fuih. Mizoram mipui nen theihtawpin kawng engkimah an intanpui tawn zel tur thu in a lo thlamuan a ni.
Zo United hruaitute hi November 8 khan Manipur sawrkar nena inkahhai puang mek hel pawl – Suspension of Operation hnuaia
group hrang hrang leh Manipura Zohnahthlak MLA awmte nen an lo inhmukhawm tawh a ni.
Manipur buaina kaihhnawihah Zohnahthlak 151-in nunna chan
