Manipur CM-in an state chhunga baihvaia awmte tlawh

Manipur CM-in an state chhunga baihvaia awmte tlawh
Manipur Chief Minister Y Khemchand Singh chuan Nilaini khan an state-a chi leh chi inkara buaina chhuak nasatna ber zinga mi, Jiribam district-a buaina avanga baihvaia awm mekte chu a tlawh a, muanna tluantling leh inremna chu an mamawh tak zet tih a sawi.
A kaihhruai sorkar ding thar chu an state chhunga baihvaia awm mek, internally displaced people (IDP)-te an awmhmun pangngaia an kir leh theihna tura an harsatna chin felsak chu an tum lian ber a nih thu a sawi.
Jiribam district a tlawhnaah hian Khemchand-a hian Jiribam Higher Secondary School-a relief camp an siama awm Meitei IDP-te a tlawh tih thuneituten an sawi.
Khemchand-a hian Meitei khua, Mongbung pawh tlawhin khaw mite pawh a kawm a, intihbuai lehlam lehlam chuan inbiak tan an ngaih thu leh an inrintawn lohna awm mekte chu an paih a ngaih tak zet thu an lo hrilh niin an sawi.
Chief minister hian IDP-te hnenah hian an harsatna tawhte chu district thuneituten an ngaihtuah a, inte pawh sak a ni a, March-ah chuan zawh hman vek beisei a nih thu a hrilh hlawm.
Khemchand-a hi President’s Rule-a kum khat dawn a awm hnuah Manipur chief minister atan lak luh niin buaina avanga baihvaia awm mekte an haw leh theihna tura hmalakna kal mek chu a hna tur lian tak a ni.
Buaina chin fel theih hun leh kalpui dan tur sawi nan chuan a la hma rih tih a sawi a; mahse, sorkar chuan harsatna awmte ching fel turin theihtawp a chhuah tih a sawi.
“Kar hmasaa chief minister atana lak luh ka nih hnuah Imphal pawn ka zin hmasak ber chu Jiribam hi a ni a. Jiribam hi Manipur-a hmun pawimawh ber, sumdawnna hmun ni tura theihna nei niin ka hria a. Sumdawnna hmuna Jiribam a chan theih nan muanna hi a awm ngei a tul a ni,” a ti.
“Thil thleng tawh chu thleng tawh a ni a, mang chhia a ni a. Muanawm taka kan nun theihna tur ke kan pen ngei a ngai a ni,” a ti bawk.
Tual chhung pawl hrang hrang, Meira Paibi, chanchinbu mi leh mi dangte pawh, an district leh state-a muanna a awma nunphung a pangngai leh theih nan mawhphurhna thuhmun theuh an nei tih a sawi bawk.
Jiribam a tlawh hma hian chief minister hian Hmar IDP-te pawh Nilaini chawhma khan a kawm a, muanawm taka awma inpumkhat turin a sawm.
An inkawmnaah hian buaina chhuaka November, 2024-a thah tak, Hmar nu kum 31 mi, Zosangkim chhungte pawh telin chief minister hian muanna an mamawhzia chu an thil tawnah a lang tih a sawi.
“Engvangin nge inpumkhata kan awm theih loh tih hi kan hriat chhuah hmasak phawt a ngai a. A hmasa berah chuan, mihring vek, Indian vek kan ni a. Kan chhuanthar lo awm leh turte ngaihtuah chungin muanawm taka awm hi kan mamawh a ni,” a ti.
Tar lan fo tawh angin Manipur-ah hian May, 2023 atang khan Meitei leh Kuki-Zo inkarah buaina nasa tak chhuakin mi 260 chuang thi leh mahni in leh lo chhuahsana tlanchhia sang tel an awm a. Chief minister bângin kum khat dawn President’s Rule-in an awm phah a, tharum thawhna zualpui reh tawh mah se hnam hnih inkarah hian boruak tang tak a la awm reng a ni.