Manipur-a Zohnahthlak Kuki-te chen tamna Tengnoupal district mipui aiawh hruaitute chu Mizoramah lokalin Zirtawpni khan chief minister Zoramthanga chu a pisaah an hmu a, Manipur buaina leh a kaihhnawih hrang hranga an thlavang a hauhsakna leh a hma a lak sakna avangin lawmthu an hrilh.
Chief minister hian Tengnoupal district dinhmun tlangpui leh harsatna an tawh dante a lo zawt a, hma lak zel dan tura a thurawn an dil angin thurawn hrang hrang a lo pe. A theih chin chinah a ralmuang zawng zela hmalak a, non-violence policy kalpui tum tlat turin a chah a. Mizoram sawrkarin mipui harsatna tawkte mamawh phuhrukna leh tanpui theihna a neih apiangah theihtawp a chhuah zel dawn tih sawiin, Mizoram leh Manipur inkalpawhna kawng pawh Mizoram sawrkarin a chei tha chho zel dawn tih a hrilh a ni. Medical emergency leh Lengpui Airport an mamawh ni atan sawrkar laipuiin Aizawl leh Churachandpur inkar helicopter service a remtih tak avangin, an harsatna tam tak a ziaawm phah a beisei thu a lo hrilh bawk.
Tengnoupal district mipui aiawh hruaitute hian harsatna an tawhna hranga hrangah Mizoram sawrkarin a tanpui that avangin lawmthu an sawi a, Zofate tan pa nih tlin taka hma a lak avangin an thlamuanpui hle tih an hrilh a ni.
Manipur Tengnoupal district Zofaten CM Zorama lawmthu hrilh
