Union Home Minister Amit Shah-a’n March 31, 2026-a ram chhung atanga Left-Wing Extremism tihbo hun a tiam chu a thleng tep a, sorkarin rei tak chhunga himna tiderthawngtute an ral ta tih puan tuma a inbuatsaih mek laiin Maoist hi tukdawl an ni tak tak thei dawn em tih zawhna a awm mek.
Kum hnih kalta chhung khan Shah-a’n ‘India himna atana hlauhawm ber’ tia a lo sawi tawh Maoist tihchimih tumin sorkar laipui chuan na zawkin, tum bik neiin thil a kalpui a. Hun tiam thlen nan ni tam a awm tawh loh laiin Chhattisgarh pumah Maoist do beihpui thlak nasat zual a ni a, a bikin helho kulhpui hnuhnung ber ni mek, Bastar division-ah a nasa zual.
Chhattisgarh Deputy Chief Minister Vijay Sharma chuan hlawhtlinna pawh an chang zel tih a sawi a, “Tun hma chuan state chhungah area committee active 30 an awm a. Vawiin hian pali chauh an awm tawh a, a bak tihbo a ni tawh. He harsatna hi March 31, 2026 hian chin fel a ni ngei ang,” a ti.
A tak takah erawh hna a la tam hle a. Venhim hna thawktu pawlte chuan Maoist zone paliah indona khirh ber ber a la awm tih an sawi a. Hengte hi Bijapur-a National Park Area Committee, commander hlauhawm tak ‘Papa Rao’-a awmna; Telangana ramri bula Pamed Area Committee, Sukma-a Jagarunda-Konta belt leh Narayanpur-a Maad Area Committee te an ni a. Heng hmunah hian ralthuam hmanga dodalna a la awm zel a, Maoist fighter 25% velin ralthuam an la keng a ni.
A zat ang zawng chuan sorkar hian hlawhtlinna a chang tih a lang a. January, 2024 leh March, 2026 laihawl inkar khan Maoist 2,500 chuang an inpe tawh a, mi 660 chuang chu thah an ni a, 1,800 chuang man an ni tawh bawk.
Hum tiam, March 31 hnu lama central force-ten an hna an la chhunzawm dawn em tih zawhna a awm meki a, hei hi chhangin Deputy Chief Minister Sharma chuan, “April 1 hi lawmna ni a ni lo. Buaina chin fel a nih pawhin venhimna kawngah fimkhur chhunzawm zel a ni ang a. Bastar-ah hian inremna a awm dawn lo,” a ti.
Himna lama mi thiamte chuan Maoist inthlunzawmna chu hnial rual lohvin a tlahniam a; mahse, tihbo vek erawh calendar-a hun tiam siama zawm mai aia buaithlak a nih thu an sawi a. Tuna an la awmna hmunah chuan an nghet hle a, a ram thlengin a zir lo va, an thuthlung vuantu an la tam bawk niin an sawi a. Tun hma atang tawhin fimkhurna a tlakhniam rualin helho inzawm leh theihna remchaang a awm tam thin niin an sawi.
India hi ‘Red Terror’ tia an sawi tawp ni puang thei turin a inring mek a, he hun hi chhinchhiahtlak tak chu a ni dawn ngei a. March 31-a puan thei a; mahse, a fiahna tak tak chu a hnu zelah a intan dawn chauh va, silai a rik loh chu hun eng emaw chen chauh a nih loh nan leh Maoism-in Bastar ramngaw a tihbuai tawh lohna tura hma lak reng a ngai dawn niin an ngai.
Maoist tukdawl hun tiam thleng hnai, rinhlelhna a awm
