March 20 &21-ah ‘Tribal Power Music Fest (Bukna Dik)’

March 20 &21-ah ‘Tribal Power Music Fest (Bukna Dik)’
H&B Water Park buatsaih “Tribal Power Music Fest (Bukna Dik)” chu March ni 20-21, 2026 hian Lammual-ah neih a ni dawn a, University & College Beat Contest buatsaih a ni dawn bakah Mizoram band leh zaithiam lar ten concert pui tham tak an nei bawk ang.
A ni khatna, March ni 20-ah hian chhun lamah Tribal Power hla panga (5) leh an duhzawng hla pakhat (1) hmangin University & College Beat Contest buatsaih tum a ni a, zan lamah band leh mimal zaithiamte’n concert an nei zui ang. A ni hnihna, March ni 21 (Inrinni) chhun lamah Beat Contest Grand Finale neih a ni anga, zanah band leh mimal zaithiam hrang hrang bakah main band Tribal Power te an zai dawn a ni.
Entry Ticket Rs.100 man a ni dawn a, entry ticket hi lucky ticket a ni nghal dawn a, a vannei berin scooter a man anga, hei bakah hian mi vannei 20 tan consolation prize siam a ni a, thla khat chhung, April ni 1, 2026 atanga May ni 1, 2026 thleng chu H&B Water Park free entry ticket an dawng dawn a ni. Ticket atanga sum lut hi hospital hrang hrang, thlan bikah Poor Fund atan chhun luh tur a ni.
Music Fest buatsaihtu H&B Water Park hi Lungverh, Sakawrtuichhun sahuan piaha awm a ni a, Mizoram Tourism Department hnuaia awm a nih angin rêl a lo luh chhoh leh khualzin an rawn pun tâkah hian hnam dang khualzinte pawhin hmun tlawh tur bik an thlante zingah a tel ta fo a. Mizoram mipui tam zawkin he intihhlimna hmun kan neih, North East-a lian ber pahnihna hi zau zawk a kan lo hriat a, ram danga pawisa thahnem tak chawia insenso vak ngai loin kan ram a kan neih ve hi ram chhung mipuite’n kan hmelhriat a tha hle a. Chhungkua leh pawl, mimal, thianhoa intihhlimna hmun kan neih hi kan chhawr tangkai ve theih nan he event hi buatsaih a ni.
He music fest-a band perform turte pawh kan band neih that rual an ni a, a hming tumtu Tribal Power bakah Mood Station, Magdalene, Boomarang, Drop Doubt, The Prophets, Triau Traxx, Knot Band leh Sunset City te bakah beat contest a Top 3 te pawh concert-ah hian an perform nghal dawn a, band bakah zaithiam rual Ruatpuii, Bzi Tochhawng, Mimi Renthlei, Matilda Amawii, Lilzo, Youngfella, Lilac, Jaui, Siampuii Ralte, Youth Icon 2024 Lalsangliana (Taitea) leh Mizo Idol 2025 Immanuel te an zai dawn bawk e.