Kumin March khan Mizoram pumah Excise & Narcotics Department leh Police Department chuan zu zuar 529 an man a, zu rui erawh 53 an man. Rakzu litres 7000 chuang man a nih bakah a senchi um 4000 chuang man a ni bawk.
Zu khapna dan hnuaiah Excise & Narcotics leh Police hian rakzu zuar leh a sakna hmun bakah lirthei veivak leh hmun dang atangin zu lam chi an dap thin a. March thla chhung bik khan Excise & Narcotics hian zu zuar 469 manin, Police-in 60, a vaiin 529 an man. Hemi chhung tho hian Excise-in zurui 32 an man a, Police-in 21, a vaiin 53 man an ni.
Excise hian rakzu litre 3658.575 leh Police-in litre 3470.75, a vaiin litre 7129.325 an man a. Zu bilh lai hi Excise-in tin 5232 manin Police-in man an nei lo. A senchi (IMFL) um puitling Excise-in um 837, Police-in um 3172, a vaiin um 4009 an man a. A chanve um hi um 984 man niin, a quarter (180 ml) um 2238 an man bawk.
Burma zu – BEDC hi Excise-in litre 383.6, Police-in litre 70, a vaiin litre 453.6 an man a. Canned beer Excise-in 533 leh Police-in 3720, a vaiin 4253 an man. Foreign atanga lakluh wine hi an pahnih hian um 1008 an man a, hei bakah hian tam tham loin beer um, foreign siam zu, zu sakna bel man a ni a; zu kaihhnawihah lirthei 26 man a ni bawk.
March ah zu zuar 529 an man, zu rui 53 man
