March ni 20-ah BTS comeback album
Kum a thar a, BTS thar pawh kan hmu dawn e, January ni 1 khan BigHit chuan an X account-ah “March ni 20 comeback kan tichiang e,” tiin an tarlang. Tihian kum li dawn group anga thawm an neih tawh loh hnuah khawvel K-pop act huhang nei lian ber BTS an rawn che chhuak leh dawn ta a ni.
Nikum khan BTS member RM, Jin, Suga, J-Hope, Jimin, V leh Jungkook te chuan an sipai tan hun an zo fel ta kha a ni a, engtikah nge an reunion theih ang tih chu fans lamin an ngaihven lian ber a ni nghal a. Nikum November khan RM chuan an comeback tur hi a lo sawithawi zauh tawh a, chutihrualin lo nghak fan fan turin fan-te a chah kha a ni a, tunah chuan an album thar nen an rawn comeback hun tur an tichiang ta a ni.
BTS hi an sipai tan hma, an vanglaiin K-pop mai pawh ni lo, khawvel huapa group huhang nei lian ber zingah an tel pha a, Billboard 200 chart-a No.1 kai thei album paruk neiin, Billboard Hot 100 chart-a No.1 kai thei hla paruk an nei thei bawk a, IFPI Global Recording Artist of the Year pawh tum hnih, 2020 leh 2021 te khan an lo dawng tawh a, a kum zawna dawng thei hmasa ber record an siam nghe nghe a ni.
Tunah chuan an member te pawh an kum a lo pung ve leh tawh a, Jimin pawh kum 30 a ni tawh a, Jungkook, 28, Jin, 33, Suga, 32, J-Hope, 31, RM, 31, leh V,30, te an ni a, an lar vanglai takin South Korean military an zawm a ngai a, kum li vel zet an chawlh hnua rawn comeback tur an ni a, an boruak ngai kha an rawn chhem alh leh thei ang em tih chu March ni 20-a an album thar tlangzarh hunah kan hre thei tawh ang.
An member zinga upa ber Jin chu sipai-a lut hmasa ber niin, December 2022-ah a lut a, June 2024-ah a sipai tan hun zoin a chhuak a, J-Hope chu April 2023-ah sipai-ah a lut ve le a, December 2023-ah chuan an vaiin an lut kim ta a ni. An group hi an tleirawl lai, 2013 khan din a ni a, rimawi khawvela K-pop lar mek rawn chhem alh lehzualtu niin, No.1 album leh No.1 singles an rawn nei ta zawt zawt mai a ni.
March ni 20-ah BTS comeback album
