Chief Justice of India D.Y. Chandrachud chuan September 22 khan October thla laihawlah marital rape dan bawhchhiatna tia ngenna chu a ngaihtuah tur thu a sawi.
“Mid-october velah Constitutional Bench hearing neih zawha ngaihtuah turin kan dah ang” tiin Chief Justice Chandrachud chuan senior advocate Indira Jaisingh leh advocate Karuna Nundy te hnenah a sawi.
Tuna Supreme Court-a ngaihtuah hi tun hnai lawka Karnataka leh Delhi High Court tena thutlukna an siam nghawng a ni ber.
Karnataka High Court chuan tihluihnaa a nupui mipat hmeichhiatna a hmanpui chuan pawngsual a ni a ti a. Apex Court-ah pawh Karnataka sorkar chuan High Court judgement chu a thehlut nghe nghe a ni.
Exception two to Section 375 of the IPC chuan marital rape chu hnawlin mipain a nupui kum 18 chunglam mipat hmeichhiatna a hmanpui chu a remtihna ni lo pawh ni se pawngsual a ni lo a ti thung.
“Mipa chu mipa, chetdan chu chetdan, pawngsual chu pawngsual, pasal mipa chuan hmeichhia nupui lakah pawh ni se a ni tho” tiin Karnataka High Court chuan penal code-in engtin pawhin ziak se pasal chuan trial a hmachhawn tho tur a ni a lo ti tawh.
Delhi High Court Division bench thung chuan nikum May thla khan split verdict siam thungin Bench pahnih awmna kaihruaitu Justice Rajiv Shakdher thung chuan Exception two to Section 375 of the Indian Penal Code (IPC) chu unconstitional tiin a hnawl thung.
He bench-a tel tho associate judge Justice C. Hari Shankar thung chuan marital rape criminalise tumna chu hnawlin dan siamthat a nih dawn chuan legislature ten thutlukna an siam ngai a ni, a chhan chu social, cultural leh legal kaihhnawih hrang hrang a nei a ni a ti thung.
Mehta chuan Chief Justice Chandrachud hnenah apex court chuan Delhi high Court three-judge bench-in thutlukna a siam chu a ngai thei lo em ni a tih chu CJI chuan apex court chuan judge pahnihte ngaihdan a hrechiang tawha hei vang hian a ngaihtuah chhunzawm zawk ang a ti thung.
Marital rape SC-in ngaihtuah dawn
