Maroon 5 leh Cardi B ‘Girls Like You’-in 1B view a kai

Maroon 5 leh Cardi B ‘Girls Like You’-in 1B view a kai
Maroon 5 leh Cardi B thawhhona hla ‘Girls Like You (Volume 2)’ music video chuan YouTube-ah vawi tluklehdingawn en a hlawh ta a, Maroon 5 leh Cardi B te tan YouTube-a vawi tluklehdingawn en hlawh thei video panga an neihna ve ve a ni.
‘Girls Like You’ hi Maroon 5 album pangana, 2017-a an tlangzarh ‘Red Pill Blues’ album-a an single pangana a ni a, hmeichhe dinhmun chawikanna lam hla niin, a bonus-edition visual hi May 2018-ah an tichhuak a, Cardi B hian ama pual verse, stripper atanga rap superstar a rawn nih dan vel te a rawn chham chhuak ve bawk a ni.
He hla hi Billboard Hot 100 chart-ah kar sarih chhung No.1 niin, top 10-ah pawh kar 33 a lang thei a, a video hi David Dobkin direct niin, Maroon 5 singer Adam Levine camera-in a la kual char char a, khawvel hmeichhe lar rang hrang- singer, comedian, athlete, activist, politician, actress leh model tlengin an inlan a, an lam kual vel a ni.
He video-a hmeichhe lar inlan zingah hian Camilla Cabello, Phoebe Robinson, Aly Raisman, Sarah Silverman, Gal Gadot, Lilly Singh, Amani al-Khatahtbeh, Trace Lysette, Tiffany Haddish, Angy Rivera, Franchesca Ramsey, Millie Bobby Brown, Ellen DeGeneres, Jennifer Lopez, Chloe Kim, Alex Morgan, Mary J. Blige, Beanie Feldstein, Jackie Fielder, Danica Patrick, Ilhan Omar, Elizabeth Banks, Ashley Graham leh Rita Ora bakah Levine-a nupui, model Behati Prinsloo leh an fanu Dusty Rose te pawh an tel.