Pathianni San Marino Grand Prix-ah hnehna chang lehin Ducati rider Marc Marquez chuan a career-a MotoGP title pasarihna tur a hnaih zel a, tun dinhmunah point 512 nei chungin a hmahruaina a sawhnghet a, vawi ruk chauh tlan tur awm tawhah point 182-in hma a hruai fal mek.
San Marino Grand Prix-ah hian Marco Bezzecchi lehpelin Spaniard a chak a, kum 2013-a a MotoGP title hmasaber a sualchhuah hnuah title paruk a la tling tawh a, tun season-ah hian champion a hnaih hle tawh a ni.
Ducati rider hian tun thla tawp Japanese Grand Prix-a a chak leh chuan title lak theihna chance a nei tawh dawn a, a champion leh a nih chuan vawi sarih title la tawh MotoGP great Valentino Rossi champion zat a nihrual tawh dawn a ni.
Kum 32 mi Marquez hnung chiahah hian a lehpelh tak Aprilia rider Bezzecchi chu thlengin pahnihna a ni a; pathumnaah Gresini Racing rider Alex Marquez a thleng ve bawk.
Pathianni race-ah khan grid-ah palina atanga bul tan ni mah se Spaniard Marquez khan an tlan chhuah atanga rei vak loah a hmaa tlan pahnih Fabio Quartararo leh a nau Alex Marquez hmakhalhin, lap 12-naah Marco Bezzecchi a lehpel zui leh a ni.
Inrinni sprint race-ah pawh khan Ducati rider Marc Marquez hian Aprilia Racing rider Bezzecchi hi a lo lehpel tawh a, mahse, tlankawng pawna a tlan chhuah avangin a chetthatpui zo ta chiah lo a; Pathianni race tak takah erawh Italian rider a lehpelh rualin a chesual duh ta lo a, a career-a a vawi 99-na atan MotoGP race hnehna changin, season kal laia a tum 11 chak berna a ni nghal bawk.
Marquez tan MotoGP title hmin hun a hnai zel
