High School Leaving Certificate Exam neih meka Social Science subject-a zawhna chhuak theia rin a zirlaite hnena lo hrilhtu Govt Mizo High School zirtirtu chu danin a phuar ang kalha che nia ngaih niin a hna atanga chawlh lailawk tir a ni a. He thilah hian Mizoram Board of School Education chuan Aizawl Police Station-ah FIR an thehlut.School Education minister Dr Vanlalthlana chuan Thawhtannia Assembly Session-ah speaker-in a phalsak angin a sawifiah a. 2024 March 8 tlaiah HSLC exam-a Social Science subject-ah Board exam-a zawhna lo chhuak thei awmte rinlawkna (suggestion) ang chauh ni si, Board exam zawhna nena inang deuh vek chu Govt. Mizo High School zirtirtu pakhatin a zirlaite hnenah a pek thu social media-ah a darh tih hriat a nih veleh MBSE hotuten hma an la nghal tih a sawi.
“He thil hi Govt. Mizo H/S zirlai pakhat hnen atangin a chhuak tih hriat a nih hnuah MBSE chuan MISSTA president, Govt. Mizo H/S headmaster leh zirtirtu inhnamhnawih nia rin chu ko nghalin, thu zawhfiah an ni a. Zirlaite pawh thu zawhfiah niin Govt. Mizo H/S zirtirtu hian suggestion chu a lo pe ngei a ni tih finfiah a ni. He zirtirtu hian naupang zirnaa chak lo bik deuh thenkhat, a hrana zirtirna (special class) neihpuiin, suggestion darh chhuak ta hi pein, zirlaite hian an lo ziak thla hlawm a. Zirlaiten an lehkhabu /rough book-a suggestion an lo ziah thlak pawh evidence atan kawl that a ni,” a ti.
Social Science subject suggestion darh chiama lang hi uluk taka chhui a nih hnuah nasa taka darh a ni lo hlauh tih hriat a ni tih minister hian a sawi a. A chhuahna school naupang pawhin an nei vek lo tih an hriat bakah zirlai thenkhat, special class kal tura tih hi an kal vek loa, a kalte pawh hian an lo ziak thla vek lem lo tih hriat a ni ta zel tih a sawi.
He thil thleng ngaihtuah hian minister hoin March 9 & 10 khan thutkhawm hmanhmawh neiin, Examination Committee pawh March 11 khan khan an thukhawm a, SS paper bika hma lak chhunzawm dan tur an ngaihtuah dawn tih a sawi a. MBSE hnuaia HSLC exam hi chu routine pangngai angin a la kal chhunzawm dawn tih a sawi a ni.
Hetiang thil dik lo lakah hian sawrkar thikthu a chhe thin hle a. Kum 2021 pawh khan hei aia buaina tenau zawkah a mawhphurtu zirtirtu chu suspend a lo ni tawhin a chungah action lak a ni. Dikhlel taka Social Science subject-a suggestion petu zirtirtu hian sawrkar hnathawk a nih anga sawrkar dan a zawm loh avangin a chungah action lak nghal a ni, tiin, March 10 khan CCS (Classification, Control and Appeal) Rules 1965 hmangin a hna atanga chawlh lailawk tir (suspend) a ni a. Hemi ni vek hian MBSE lam pawhin Police Station-ah FIR an thehlut nghal a. School Education department lamin disciplinary proceedings a la chhunzawm dawn tih minister hian a sawi.
“He thil thleng hi a pawi kan ti takzet a. Suggestion petu ngei pawh hian hetianga boruak awm leh mite ngaihven a ni dawn tih hria se chuan a tih kan ring lo. Zirlai suggestion dawngtute hi kan dem loa, chhuizuia umzui zel pawh kan tum lo. Zirtirtu sang chuang karah zirlaite hnena zawhna lo sawichhuaktu mi pakhat hian zirtirtu dangte nihna a tarlang lo tih hi mipuiin min hriatsak turin ka ngen a. Hetianga zirtirtute zahawmna tihmelhemtu lakah hian dan anga hma lak kan tum a, hun dangah pawh khauh takin hma kan la zel ang,” a ti.
Matric exam zawhna chhuak thei awm petu suspend a ni MBSE-IN FIR A THEHLUT
