May thlaah S-400 air defence system palina thlen beisei

Tun thla tira Indian Air Force (IAF)-in thawn chhuah hmaa an endik zawh hnua S-400 Triumf air defence system palina chu Russia atangin thawn chhuah tawh a ni a, May thla laihawl velah India a thlen rin a ni.
Ralthuam leina tura inremna (contract) ziak hmasak hnuaia S-400 regiment pangana leh hnuhnung ber pawh November thlaah chuan India a thlen leh hman beisei a ni bawk.
Air defence system dawn leh hun tur hi Operation Sindoor kum khatna atanga ni tam la liam lovah a ni dawn a, beihpui thlaknaah khan S-400 hi Pakistan-in van sang atanga hlauhawm a thlen theih tam tak dangtu a ni.
India leh Russia chuan President Vladimir Putin-a’n October, 2018-a New Delhi a tlawh tum khan S-400 regiment panga, Rs. vaibelchhe 40,000 vel senna tur inremna hi an ziak a ni.
A hmasa pathum chu Russia hian a hlan tawh a, IAF kutah a awm tawh a. A palina tur hi kum thum chuang zet a khawtlai a, hei hi Russia leh Ukraine inkara indonna chhuak vanga thil a kal pangngai theih loh vang a ni.
Pakistan laka air defense tihchak nan Rajasthan sector-ah system palina hi hman a nih rin a ni.
March thla khan Defence Minister Rajnath Singh-a kaihhruai Defence Acquisition Council chuan Russia atanga S-400 system panga lei belh tur chu an lo pawm leh tawh bawk a, a thlen kim vek hunah chuan India hian 10 a nei dawn a ni.
Thu dawnna chuan chah hnuhnung zawk hi inremna awm sa zawmtu anga ngaih a nih avangin CAATSA-ah harsatna a tawh loh beisei a ni a. US-a Donald Trump-a leh Joe Biden-a sorkar pahnihte chuan a hma khan India hnenah S-400 lei hmasak kha kalpui a nih chuan CAATSA hnuaiah hrekna siam a ni thei tiin a lo vau tawh a. Hei hi US dan a ni a, Russia, Iran leh North Korea nena insumdawn tawn ramte hremna a ni.
India-a Russia Ambassador Denis Alipov-a chuan April 16 khan system dang pahnih hlan chu hun ruat sa anga tih a nih thu a sawi a. Russia chuan he system enkawl dan tur hi Indian sipaite a zirtir tawh a bawk.
S-400 unit 10-te hi India-a hmun khawmual atanga boruak hla taka mi kahna missile programme Project Kusha nen an thawk dun thei dawn a, India chung boruak chu drone, indo thlawhna changkang leh ballistic missile lakah a veng thei dawn a ni.