MBA Awards 2024 sem a ni

MBA Awards 2024 sem a ni
Kar liamta Inrinni khan Mizoram Badminton Association (MBA) chuan season kalta chhunga player chetha zualte hnenah MBA Awards 2024 a hlan a; he chawimawina hian trophy bakah pawisa fai leh badminton bungrua chi hrang hrang a keng tel a ni.
Badminton Inn Player
of the Season
MBA s2024 hi category paliah then a ni a, chu’ngte chu: badminton inn player of the season (male & female) leh most promising player of the season (male & female)-te an ni. Badminton Inn player of the season (mipa) lawmman dawngtu chu H. Lalthazuala s/o H. Zohmangaiha, Chanmari West veng, Ralte Villa Badminton Club player a ni.
Season kalta khan |hazuala hi 35th Sub-junior National Championship, Hyderaba d-a nghahah khan Under-17 Boy’s Singles category champion a ni a, All India National Sub-junior Ranking Badminton Tournament, Lucknow khawpuia khelhah U-17 Boy’s Singles champion a ni bawk.
North East Zone Interstate Badminton Championship 2023, Arunachal Pradesh-ah khan U-19 Boy’s Singles inelna huangah gold medal lain, MBA Official Championship 2023, Senior (Men’s singles) leh Junior category (Under-19 Boy’s singles)-ah te a champion kawp bawk.
He’ng bakah hian 30th Smt. Krishna Khaitan Memorial All India Junior Ranking Prize Money Badminton Tournament (Under-19), Panchkula, Chandigarh-ah silver medal awrhin, he final hi hliam avangin a khel tluan thei lo nghe nghe.
Season kalta khan |hazuala hi U-17 Boy’s Singles-ah India aiawh tura thlan niin, Chengdu, China-a Badminton Asia Championship-ah a inlan a; Yonex German Junior 2024 mens singles inelnaah India ai a awh bawk.
Hmeichhe lama badminton inn player of the season atan Lalrempuii d/o Albert Lalrosanga, Serchhip, Ralte Villa Badminton Club tana khel chu thlan a ni ve thung.
Rempuii hian season kalta khan North East Zone Interstate Badminton Championship under-19 mixed doubles leh girl’s doubles category-ah gold medal a la ve ve a; North East Games 2024, Dimapur-a zawh tak mixed doubles category-ah Gold medal vaw chhuak bawkin, MBA Inter DBA Championship 2023-ah Ralte Villa BC Senior Mixed Team a champion pui bawk.
He’ng award pahnihte hi Badminton Inn, Chaltlangte chuan an sponsor a, pawisa fai leh trophy an dawn bakah Sunlight Sports dealer-te atangin badminton kit an dawng bawk.
Most Promising-ah Mama leh Thari
Malsawmhlua s/o Albert Lalnunhlima, Serchhip hnenah Most Promising Player of the Season (Male) chu hlan a ni. Mama pawh hi season kalta chhung khan a chetha hle. 2nd Ashwini Gupta Memorial All India Sub-junior Ranking Badminton Tournament 2023, Panchkula, Haryana-a khelhah under-15 boy’s doubles gold medal a la a, hemi category-ah vek hian All India Sub-junior Ranking Badminton Tournament 2023, Lucknow-a nghahah silver medal a arh bawk.
MBA Official Championship 2023 (junior)-ah khan under-15 boy’s singles leh boy’s doubles category-ah a champion ve ve bawk. Kumin August thlaa kum 15 tling tur Mama pawh hi Ralte Villa Badminton Club player tho a ni.
Kum 14 chiah a upa, Champhai Vengthlang tleirawl Zoramthari d/o Rinsangpuii, Ralte Villa Badminton Club tana khel mek chu most promising player (female) atan thlan a ni thung.
Ani hian season kalta chhung khan All India Sub-Junior National Ranking tournament, Bangalore-a khelhah under-15 mixed doubles category-ah bronze medal a dawng a; The Gaudium Sub -junior Open Tournament, Telengana-a khelhah under-15 mixed doubles category-ah vek hian a champion bawk. Season kalta khan training laia a chetthat avangin Pullela Gopichand Badminton Academy (PGBA)-a awm tura thlan a ni nghe nghe.
Mizoram Badminton Association chuan MBA Awards 2024 dawngtute a lawmpui a, an hmalam atan hlawhtling tura an in buatsaihna kawng hrang hrangah duhsakna sang ber a hlan tih thuchhuah siamin an tarlang.