Mbappe goal hmanga season chhuih hawng Real

Mbappe goal hmanga season chhuih hawng Real
Thawhlehni zanah Kylian Mbappe second-half penalty chhuihluh hmangin Real Madrid chuan si khat faiin an mikhual Osasuna lakah hnehna an sualchhuak thei hram a, Santiago Bernabeu stadium-a La Liga season thar bul an tannaah awlsam lo takin point thum an hlawhchhuak.
Head coach atana an midfielder hlui Xabi Alonso an rawih hnuah a vawi khatna atan Spanish coach-in league-ah bul a tan a, home match-ah hnehna a chanpui nghal.
Mipui 68,407 pungkhawm hmaah mualneitu team khan first half chhungin Osasuna tlarhnung khawng char khawn bur an paltlang zo lo tluanchhuak a; second half tir lam minute 51-ah Mbappe chuan a hlawhchhuah penalty hmangin Real hmahruaina chhuihlut bawk mah se hun pumin hei lo goal dang an khung belh zo lo.
Mikhual tlawmna belhchhah turin hun pekbelhah an player Abel Bretones chu Gonzalo Garcia laka a ‘foul avangin hnawhchhuah a ni.
Club World Cup semi-final pakhat zawka si li faia Paris St Germain an hneh loh hnua competitive game khel leh tan chiah Alonso team hian Thawhlehni zan inkhel kha thunun pumhlum bawk mah se an passing a ban tlat a, an real chance han neihchhunte pawh hla tak tak atangin a ni a; Brazilian defender Eder Militao chhuih pui tak chu Osasuna keeper Sergio Herrera chuan mawihnai takin a lo dang thei hlauh a ni.
Second half tan atanga minute ruk a kal chauh tihah Osasuna tlarhnung ven hna tha taka lo thawh tawh chu France captain laka Juan Cruz chetsual avangin a lo thlawnah a chang ta thut a, Real French forward hian mikhual keeper tluk lohna lama chhuihin home team-in goal an sualchhuak thei hram.
Bernabeu club hian an goal hnihna tur beiseiin nawr chhunzawm ngar ngar mah se an hlawhtling thei lo a; area pawn atanga Arda Guler shot chu goal kham chungah a thlawk chhuak.
Alonso khan a back four-ah lei thar pathum Trent Alexander-Arnold, Dean Huijsen leh Alvaro Carreras-te bul a tantir laiin rawlthar kum 18 mi Argentine midfielder Franco Mastantuono pawh a Real debut a nghahchhuahtir bawk.
Mastantuono hian goal a thun nghal teuh viau a, angle zau tak atanga a goal zawn chu Herrera tan dan harsa lutuk a ni lo a; Osasuna lam pawhin Ante Budimir hmangin an siphurh sutna hun remchang hmu ve bawk mah se goal chungah a tauh chhuak.
Season liamta league-a pahnihna Alonso team Madrid hian hnehnain league season bul tan bawk mah se Barcelona kut atanga league title chhuhlet tur an nih avangin bul tan fuh ngawr ngawr hi a tawk zo dawn hauh lo!
Inrinni liamta khan an bultanna inkhelah Barcelona chuan si thum faiin Mallorca an sawp thei bik a; kha vang khan Alonso tan engti kawng pawhin point thum hum chunga bul tan ve a ngai!
A player pawimawh inhliam rualkhat – Jude Bellingham, Ferland Mendy, Eduardo Camavinga leh Endrick-te a chhawr theih loh laiin hrem tawk Antonio Ruediger chu squad-ah a telh a rem lo bawk a, chuti teh nuai chung chuan goal khung lamah harsatna an tawk a, Mbappe vangin hnehna an lawm thei hram a ni!
Inkhelh banah France international chuan, “A harsa dawn tih hre lawk tho mah ila kan khelmual ngei maia chak chunga bul kan tan thei kha a pawimawh khawp mai.
“Osasuna khan tum felfai leh chiang tak an nei a, goal venhim kara nawr thei tur Budimir an nei bawk a; chuti chunga hnehna kan chang thei hi kan hlim a, chak zel pawh kan beisei dawn a ni.
“First half-ah khan hmunawl kan ngah tawk lo a, second half hma taka kan tilut hlauh kha kan ni hlawh ta a ni.
“Chance kan ngah zawk a, inkhel pawh kan thunun zawk miau avangin kan goal hnihna sualchhuah leh ngei kha kan beisei em em laiin kan hlawhtling zo ta lo a ni,” a ti.
Kumin nipui insuan hun laia Liverpool atanga lei thar England right-back Trent Alexander-Arnold khan Real Madrid tan vawi ruk lai chu khel tawh mah se tun kha a La Liga debut niin, boss thar hnuaia Fifa Club World Cup semi-final an thlenna kawngah match nga a khel a; Bernabeu-ah minute 68-a Dani Carvajal-a’n a thlak laiin mipuiin ‘standing ovation’ nen Englishman khelmual chhuahsan tur an thlah.
Bournemouth atanga an lak thar defender Dean Huijsen pawhin La Liga bul a tan ve bawk.
Debutant dang kan hmuhte chu pound maktaduai 43 senga lakluh Benfica left-back hlui Alvaro Carreras leh River Plate atanga pound maktaduai 38.5-a lei rawlthar midfielder Franco Mastantuono-te an ni.