Zoram Medical College atanga MBBS zirchhuak hmasa berte an lawmpui tih MNF party chuan an sawi.
MNF Gen. Hqrs. thuchhuak chuan, ZMC-ah hian 2018 August 7-ah MBBS zirna bul tan a ni a. Thla thum hnu ah inthlanpui awmin MNF a sawrkar a. He medical college tihhlawhtlinna tura theihtawp chhuah ngar ngartu, Health minister hlui Dr R Lalthangliana’n ngaipawimawhin hma a la char char a. A ni bakah khatih laia he Board-a member leh thawktu hrang hrangte hmalakna avangin MBBS zet kan nei thar chu lawmawm an ti takzet tih a sawi.
MNF sawrkar tirh lam, kum 2019 chuan tluang takin sawrkar a kal a. Kum 2020 atanga a hnu kum hnih chhung Covid-in min nuai a, kha’ng hun harsa karah khan ZMC zirna inpui pawhin nasa takin harsatna a tawk a. Dr R Lalthangliana hian hma a la zui zel a, khatihlaia Health secretary, ZMC director leh thawktu dang zawng zawng chungah MNF chuan lawmthu a sawi bakah sum leh pai harsatna karah Planing, Finance, DP&AR leh thawktu dangte chungah an lawm tih a sawi bawk.
‘National Medical Council-in uluk taka MNF sawrkar laia he medical college an endikna paltlang a, 2023 June 16-a recognision (pawmpuina) min pek avanga MBBS zirlai hmasa ber, kum 2018-a zir tan ten 2024 April 30-a internship paltlanga doctor puitling 95 kan nei thei a, MNF sawrkar hmalakna leh a sulsutute chungah lawmthu kan sawi a ni,’ thuchhuah hian a ti.
ZMC a nih hma, State Referral Hospital din phalna kum1999-ah sawrkar laipui Planning Commission min pek hnu ah, MNF sawrkarin cheng nuai 4000 ruahmanna a hmu a. State Referral Hospital a nih lai 2005 July 21-ah khum 50 awm theihna turin bul tan a ni tih a sawi a ni.
Hetianga doctor puitling 95 kan neih takah chuan hospital hrang hranga doctor indaihlohna a phuhruk ngei a beisei tih sawiin, doctor zirchhuak ta te pawhin mipui rawngbawltu an nihna hria a, ram leh mipui tan a tulna hmun apianga pen chhuak thei turin MNF chuan beiseina sang tak an lakah a nei tih a sawi. Tun sawrkar tharin ZMC hmasawnna tura sawrkar hmasa thil lo tih tawhte chhunzawm zel turin a ngen tih a sawi bawk.
MBSS zirchhuakte MNF-in lawmpui
