Aizawl Municipal Corporation Board of Corporators chu Nilaini khan an thukhawm a. In sak khuahkhirhna dan, AMC Building Regulations huamchhunga factory leh commercial centre te hamthatna dah lut tura siamthat chu lungrual takin an pawm.
Aizawl khawpui chhunga hotel, hostel leh restaurant ten faina leh thianghlimna kawngah AMC dan leh hrai an zawm tha em, tih enfiah tura motion lut chu an pawm bawk.
BOC thutkhawm kaihruaitu Aizawl mayor Lalrinenga Sailo sawm angin, executive corporator B Lalawmpuii chuan AMC Building Regulations 2012 Amendment proposal a sawifiah a, member-ten sawiho chhunzawmin, lungrual taka pawm a ni.
He building regulation amendment hi stand-alone factory leh flatted factory te bakah commercial centre chhunga building ten an ram neih ang hmang tangkai lehzual tura building regulation siamthat rawtna a ni a. State sawrkarah pawmpui turin thehluh a ni ang.
AMC Ward No.V corporator Rosiamngheta putluh, ‘Aizawl khawpui chhunga restaurant, hotel leh hostel te hi AMC Licensing Regulations hnuaia awma establishment neiin, register an nih angin an inenkawlna thianghlim leh that dan endik sak ni rawh se,’ tih chu sawihoin lungrual takin pawm a ni a. Hmalak dan duang turin Sub Committee din nghal a ni a, chairman atan Rosiamngheta ruat a ni.
Thutkhawmah hian corporator-te an tel tha a, tunhnaia corporator thlan thar, Ward-XIX bialtu Dr C Malsawmtluangi leh Ward-VI bialtu H Lalremtluanga te pawh an tel a ni.
MC-in Buidling Regulations huang zauh rel
