MCC bawhchhiaah inngai lo
Tunhnaia a thusawiah election model code of conduct bawhchhiaa puh a nihnaah, bawhchhiat a nei lo tih minister Lalnghinglova Hmar chuan a sawi.
Thawhtannia ZPM office-a inkhawmah Aizawl West-II bialtu MLA Lalnghinglova Hmar chuan tunhnaia Aizawl West-II bial huamchhunga ZPM Local Council candidate-te inhmuhkhawma a thusawiah model code of conduct kalh a awm lo tih sawiin, local council inthlan tura ZPM candidate-te inhmuhkhawmnaah hian party mi a nih angin sawm a ni a, thu pawh a sawi ngei a. Mizoram sawrkarin Aizawl West-II bial tana hma a lak tawhna, SASCI Part-III hnuaia Aizawl West Outlet Project, motor kawng siamna tur sawrkarin a ruahman fel tawh thu leh hemi atana sum pek a nih tawh thu a sawi a, administrative approval hmuh vek tawh a ni tih a sawi.
Vaivakawn Market sakthatna tur chungchang a sawi pawh sawrkarin a ruahman fel vek tawh, local council inthlan puan hma kumin January 7-a State Level Committee on SASCI-in a pawm, vantlang hmuh theih tura I&PR website-a hemi ni vek tlai dar 5.00 a dah chhuah tawh a ni tiin, “Heng thil hi project thar a ni loa, sawrkar hmalak tawhna a lawmawm kan tih em vanga I&PR pawhin a tarchhuah tawh kan sawi nawn ve leh mai a ni. A lawmawm tehlul nen mithenkhat chuan State Election Commission ah MCC bawhchhia tiin min hek ta a ni,” a ti.
Model code of conduct-in inthlan atana vote duh vanga hmalakna thar puan a remti loa, chu chu hrereng chungin a thusawinaah pawh sawrkar hmalakna thar tur sawi chakawm tak tak pawh a insum zawk tih Lalnghinglova Hmar hian sawiin, “Heng ka thusawite hi chu sawrkar hmalak tawhna a ni a, veng chhung leh bial chhung bakah Aizawl khawpui tan leh Mizoram tan pawha sawrkar hmalak tawhna thu lawmawm, vantlang hriata tarlan tawh, kan sawi chhuah ve leh te inheknan min hmang duh mai hi, mipui lawmnaah hian party thenkhat chu an lawm ve lo niin ka hria, a ti.
MCC bawhchhiaah inngai lo
