MDM WINTER BLAST 2024 MI HARSATE PUALIN
Music Domain Mizoram (MDM) chuan a din tirh atanga a lo tih thin angin tanpui ngaite pualin kum tin a luangchhuak thin a; Vantlang kawngsirah leh AR Lammualah Charity Concert a buatsaih thin. Mizorama zaithiam kan neih that tam tak pawhin midang tanpui nan a thlawn liau liauin Pathian atanga an dawn an thiamna (talent) an phochhuak a. Midang tanpuina thinlungpu mipui tam takin harsa zawkte tan pawisa an thawhkhawm a, MDM chuan luanchhuah hun hlu tak a buatsaih thin a ni.
MDM chuan kum 2022 khan Charity Concert Lammualah a lo buatsaih tawh a. Mi harsa zawkte tanpuina tura kalkhawm mipuite thawhkhawm zawng zawng pawh cheng nuai khat leh sing riat chuang a ni. Kumin hian Lammual bika a vawihnihna atan ni 23.12.2024 (Thawhtanni) hian mi harsa zawkte pualin ‘MDM Winter Blast 2024’ Charity Concert a buatsaih leh dawn a. He hunah hian mipuite a hmuna chhima tanpui ngaite tanpui tura fehchhuak turin MDM chuan a sawm takzet a, Free Entry a ni ang.
He hun hi AR Ground (Lammualah) ni 23 chhun dar 12:00 atanga zan dar 10:00 thlenga neih tur a ni a. Concert pawh chhawng li tura duan a ni. A hmunah hian eitur chi hrang hrang leh lei tur tam tak a awm dawn a. Tin, hemi ni hian Aizawlah No Vehicle Zone hman a ni dawn avangin bazar tura kalchhuak te’n mi harsa zawk tanpui turin MDM chuan Lammual pan turin a sawm a ni. Mizoram Top Artist leh Band tha tak tak an zai dawn bakah Cosplay, Fashion show bakah mit ti tlai tur thil chi hrang hrang hmuhnawm tak tak thlir tur a awm dawn bawk a. MDM hian he hun (Programme) atan hian Department, pâwl leh mimal atangin Sponsorship a hmu a ni.
Music Domain Mizoram chuan Art & Culture Department, Active Sound, Tluangpuii Hmar, Aries Boutique, Elva Moda, Mizoram Cosplay Organization, Blue Mountain, Mark Advertising leh Kawllen Cultural Club-te hi mi harsa zawkte pual Concert ‘MDM Winter Blast 2024’ atan hian a thawhpui bawk a ni.
MDM WINTER BLAST 2024 MI HARSATE PUALIN
