Meichher Award 2025 sem

School Education Department-in thla tina a chhuah thin Meichher Award 2025 chu Nilaini khan sem a ni.
Hmanpuitu School Education director Angela Zothanpuii chuan, Meichher hi Mizo thu leh hlaa kan article lar tak tak lo chhuahna a ni a, thuziaktute pawh mi chhuanawm tak tak an ni tih a sawi.
Thu leh hla chu mihring min vawngtu pawimawh a ni, tiin, “Thangtharten lehkha ziak hlutna kan hriat thar leh a ngai a, hnam pum leh department pawhin hma kan lak nasat a ngai hle,” a ti. Saptawng thiam ngaihsanna thlak a, mahni hnam tawng ngaihsanna kan neih a, kan chawisan zel a ngai tih a sawi a. Meichhera chhuak thu leh hla tha ziaktute chu mithiam tak tak te an ni hlawm, tiin, hei hian thu leh hla pawimawhna a lantir tih a sawi a ni.
Meichher chanchinbu hi ‘Zoram Eng’ tih hmingin March/April 1975 atang khan thlakip chhuakin chhuah tan a ni a. October 1975 atang khan ‘Meichher’ tia thlakin vawiin thlengin chhuah a ni. Kum 2025 khan kum 50 a tling a, kum 1975 March & April thla chhuak atanga chhiarin January 2026 chu bu 815-na a ni.
Meichher publisher atan hian tihchhuah tan tirh atangin department hotu ber, director hman a ni thin a. Meichher publisher ni lai chu Angela Zothanpuii a ni. Meichher editor 10 an awm tawh a; editor hmasa ber chu R Lalrawna a ni a, tuna Meichher editor chu TC Lalremsiama a ni.
Meichher chanchinbua thu chhuah zingah zirlaibua sengluh thuziak 22 a awm tawh a. Hengte hi school leh college-a Mizo zirlai atan hman an lo ni tawh.
Meichher Best Article of the Year 2025-ah Rev Zosangliana Colney Mission Veng Aizawl thuziah – “Lal thar chibai i buk ang u” tih thlan a ni a, pahnihna Joseph L Ralte Chawnpui Veng thuziah – “Hlawhtling tura beidawnna” tih a ni. 3-na chu commissioner Lalkiamlova Tuikual South Aizawl thuziah “Vawk leh Mizote” tih a ni.
Meichher Best Contributor of the Year-ah pakhatna JH Biakmawia, Electric Veng Aizawl; pahnihna Familia Laltansanga Fanai, Zotlang Lunglei; pathumna Mahmuaka Chhakchhuak, Chanmari Lunglei an ni.