Melbourne final:
Sabalenka vs Rybakina
Naktuk zana Australian Open women’s singles title inchuh tur nimin khan chinfel a ni a, he hmuna kum 2023 leh 2024 title la zawn tawh Aryna Sabalenka leh Wimbledon champion hlui Elena Rybakina-te an innuai leh dawn!
Kum 2023 Melbourne Park final-ah Kazakh world number five Rybakina hi Belarusian world number one Sabalenka lakah a lo tlawm tawh a, Inrinni zan hian phuba lak a chak khawpin a rinawm!
Hard court bik head-to-head record-a 6-5-a chungnung hram hram Sabalenka hian nimin semi-final hmasa zawkah 6-2 6-3-in Elina Svitolina a hneh a, a zawn zatin a tum lina atan Australian Open final a lut ta a ni.
Kum 2002 daih tawha hming chher hat Martina Hingis hnu lama a zawn zata Australian Open women’s singles final tum li lut thei hmasaber a ni ta mai kha mak a tih thu leh a awih loh hial thu Sabalenka hian inkhelh bana an kawmnaah a sawi chhuak nghe nghe.
Aryna Sabalenka hi professional era chinah Australian Open final kum li lut zawn thei hmeichhe player pathumna chiah niin, a hmaa mi huai kalhmasa pahnih Evonne Goolagong Cawley (1971-76) leh Martina Hingis (1997-2002)-te chuan kualkhung chhunga kum tarlan zat ang hian a zawn ve vein he final hi kum ruk chhung tehreng zu khel a!
Ukrainian 12th seed Svitolina khan semi-final a luhna kawngah top 10 player pahnih hnehin, top seed Sabalenka meuh chu a khan lo rih deuh!
Semi-final dangah fifth seed Rybakina chuan American Jessica Pegula laka 6-3 7-6 (9-7) hnehna awlsam lo tak changin, kum thum kalta Melbourne final-a Sabalenka Grand Slam trophy hmasaber hmin lai mittui nena a thlirliam hnuah a vawi khatna atan major final a lut leh ta hram a ni.
Quarter-final lama world number two Iga Swiatek leh tunah sixth seed Pegula paltlang thei a nih ve miau avangin Belarusian tan pawh he Grand Slam tournament fial-a a lo hneh tawh Rybakina hi chona lian a tling leh ngeiin a rinawm!
Nikum Wimbledon hnu lama vawi 37 chak tling leh tawh Rybakina hi kha mi All England Club major tournament hnu lama WTA Tour-a chak hnem ber ni mekin, a match khelh hnuhnung 20-a a tlawm awmchhun chu tunthla tir lam Brisbane khuaa Karolina Muchova a ngam loh chiah kha a la ni a, Inrinni zan final-ah pawh hian inthlahrung deka khel tur chi a ni lo!
Kum 27 mi Sabalenka leh Rybakina-te hian tun tournament kal laia match ruk an khelh tawhah set an la hloh lo ve ve a; a Grand Slam singles title pangana tur beisei mek Belarusian zawk hi match 11 chak zawn lai mek ni ve bawkin, strong-serving Rybakina tan pawh kum thum kalta ai mah khan a khawng zawk thei tho!
Kazakh world number five nena final an khelh tur boruakah Sabalenka hian nikum final set thum inbeihnaa Madison Keys a ngam loh ringawt chungchang sawi chhuakin, kha inbeihnaah khan a huaisen tawk lo tih a pha lo a, naktuk zan hi chuan hlauh nei tawh lo turah ngai chhin phawt ang!
Melbourne final: Sabalenka vs Rybakina
