Kum 2012, 2013, 2015 leh 2018 champion Novak Djokovic chuan a a recrod kawl lai belhchhaha a tum ngana atana Shanghai Masters hawn turin kawng dik a zawh zel a, Nilaini khan 6-3 6-1-a Russian Roman Safiullin sawp chunga quarter-final lutin, tuntum hian a champion leh chuan a career-ah ATP title 100 a la tling tawh dawn a ni.
Serb kum 37 mi hian kumin August thla khan Olympic gold awrhin, kha kha a title 99-na chiah niin, Shanghai semi-final-ah hian Czech rawlthar Jakub Mensik a hmachhawn leh a, final a luh leh luh loh tarlan hman a ni lo.
Grand Slam title 24 la tling tawh Djokovic hian Shanghai Masters title a la leh thei a nih chuan mipa zinga tournament hnehna century siam tling awmchhun pahnih Jimmy Connors (109) leh Roger Federer (103)-te hnung a zui ve thei dawn a ni.
He thu buatsaih lai hian chiang la awm lo mah se second seed Alexander Zverev chu semi-final lama Djokovic-a tum theih tur langsar a nih laiin Nilaini vek khan German hi rin loh takin Belgian veteran David Goffin chuan 6-4 7-5-in a hneh nawlh!
Kum 33 mi Goffin hi kumin June thla mai khan world ranking-ah top 100 luah chhunzawm zo loin pawn lamah a tawlhchhuak a, chu mi hnuah a hum ngai luahkir turin a thawkrim a, kum 2022 Wimbledon hnu lama a vawikhatna atan ATP 250 level chung quarter-final a lut ve leh ta a ni.
World number one Sinner pawh American 14th seed Ben Shelton lakah 6-4 7-6 (7-1)-a chakin, quarter-final pakhatah Medvedev nen an insu.
Russian fifth seed Medvedev hian Greek 10th seed Stefanos Tsitsipas laka 7-6 (7-3) 6-3 hnehna changin last eight a lut ve bawk.
Karliamta maia Beijing title latu Spaniard Alcaraz pawhin match 12 a chakzawnna ni turin French veteran Gael Monfils lakah 6-4 7-5 hnehna a sualchhuak.
Mellung thar phun hnai Djokovic
