MESA-in works department ni lo tan engineering work thawh duh lo

MESA-in works department ni lo
tan engineering work thawh duh lo
Mizoram Engineering Service Association chuan sawrkarin non works department tan engineering works thawk ve thei tura a ti chu hnukkir tura ngen an tum.
Zirtawpni khan Mizoram Engineering Service Association (MESA) hian Aizawlah annual general conference vawi 43-na an hmang a. An thurel zingah, tunhnaia sawrkar hriattirna tihchhuaha non-works department tana engineering works thawk ve thei tura a tih chu tha lo a ti a. He notification hi ennawn a, hnukkir turin sawrkarah ngen nise an ti.
Sawrkar policy tihlawhtling turin theihtawpa tawiawm tha nise, an ti a. A bikin engineering works-ah phei chuan theihtawp chhuah turin member-te an ngen tih a sawi bawk.
MESA conference hmanpuitu DP&AR minister K Sapdanga chuan engineer-te chu mipui mamawh sawi ngai miah lo khawihtu an nih avangin an tih that aiin an tih that loh lai a langsar thin a, an chungah mipui beiseina a sang tih a sawi a. Engineering department chu ram ruhrel an ni a, discipline leh inenkawl dan entawntlak tak a nih rualin, hna hmawrbawkna – field execution lamah supervision kan tlachham deuh em tih ngaihtuahnaah awm se a duh tih a sawi.
Year of Consolation leh inrenchem kalpui a nih mek avanga works department lamah harsatna kan nei chu pawi a tih thu a sawi a. Engineer-te chu an hna kut tling leh nasa lehzuala thawk turin a chah.
“Works department hi aikal la tamna a ni thin a, tunah chuan thuawi taka sawrkar hmalakna in thlawpnaah lawmthu ka sawi a. Mipui khawsakna kawngah tun aia awlsam zawka kan awm theihnan leh kan state per capita income a lo pun deuh deuh theihnan in pawimawh em avang leh, kan ram hmasawnna tura innghahna bulpui ber in nih avangin tan la sauh sauh ang che u,” minister hian a ti.
Report-a tarlan daninm tunah hian MESA member 286 an awm a. Works department pali – PWD-ah 154 awmin 62 hnawhkhah loh a awm a; P&E-ah sanction post 95 awmin 41 a ruak a. PHED-ah sanction post 72 awmin 17 a ruak a; I&WD-ah sanction post 17-ah 10 hnawhkhah loh a ni.