Pathianni Major League Soccer match pakhata 6-4 tehrenga Philadelphia Union an hnehna inkhel minute 73-naah Inter Miami CF superstar Lionel Messi chua lakchhuah a ni a, World Cup trophy an kawl mek humhim tuma inbuatsaihna tan chho mai tur Argentina lam an phu dual!
Kum 38-a upa ni tawh Messi hi seasion tawp lama chau tawngkhawngin a hrinchhuah kaihza veilam tha rim lutuk natna (muscle fatigue) an tih ang kha niin media report-ah a lang a, a free kick chhuihna lama intina a nih thu Thawhtanni khan club thuchhuah chuan a tarlang.
World Cup tan hmaa chawlhkar thum pawh inbuatsiahna an neih tlin tawh loh laiin club tana a league match hnuhnung ber ni rihah a han intina leh ta hlauh a; an captain tana World Cup hnuhnungber ni tawh tur an beisei mek hi Argentina tan a tawlhliam em lo turah ngai phawt ila!
South American team hian Kansas City khawpuiah June ni 16 khian Algeria hmachhawn chungin Fifa World Cup 2026 title humhim tura an match hmasaber an khel dawn a, tah hian squad-a tel zui tho tura beisei an captain hi chhawr hman tak ang maw?
Argentine forward inhliam chungchanga Inter Miami thuchhuah chuan Thawhtannia hliam dinhmun an zirchian lehzualnaah a kaihza veilam tha chu hah rimtawng lutuk avangin a chau niin an sawi!
National team manager Lionel Scaloni chuan a star forward chu a hun taka a dam hman a beisei tlat thu sawi chungin, team training zawm tura a kir theih hun tur chu a hmasawn danin a hril tur thu a sawi.
Defending champion Argentina coach Scaloni chuan he thu buatsaih lai thleng hian kumin World Cup-a a hruai tur player 26 la thlang fel lo mah se eight-time Ballon d’Or winner Messi hi tun thlatir lama provisional 55-man squad a puanah chuan a telh ngei a, final squad-ah pawh tel zui zel tura ngaih ngheh a ni.
Inter Miami coach Guillermo Hoyos ve thung chuan Messi thlak a nih chhan kha chuti chiama serious a nih loh thu leh chauh satliah vang niin a sawi ve thung.
Major League Soccer hi World Cup avangin an chawl rih dawn a ni.
Messi captain-na hnuaiah Argentina chuan kum 2022 khan Qatar ramah World Cup title hlawhchhuakin, he tournament-a an champion vawi thumna a ni a; an title kawl lai humhim an tum leh mekna kawngah Messi tel lo chuan sera mu an thur thei dawnin a lang lo a; Barcelona legend hi kumina a inlan leh a nih chuan World Cup vawi ruk a khelhna a ni tawh ang!
Messi hian tun season-ah MLS game 14 khelin goal 12 a thun tawh bakah assist tum riat a siam tling tawh a, he category pahnihah hian pakhat ve vein hmahruaitu a ni lo.
2025 regular season-ah khan game 28 khelin league goal 29 leh assist tum 19 a nei tling a, kum 40 hnaih tawh lamah pawh top scroer la ni zak zak thei hi kumin World Cup-a tar thut thei a la ni lo!
Messi inhliam hun a timing lo!
