Messi kir zanah Argentina chakpui zo lo!
Kumin July thla Copa America final-a Colombia an hneh tuma a hliam a dam fel hnuah captain Lionel Messi chuan Ningani zan khan South American World Cup qualifiers khelin Venezuela a hmachhawn a, minute 13-na leka Otamendi goal tur siamsak mah se a ma puala goal a khung zawh loh zanah a team chakpui zo loin 1-1 draw nen ngui nghiaiin khelmual a chhuahsan!
Kum 37-a upa Messi kir zan hian ruahpui vanawn sur avangin team pahnih inkhel hi darkar chanve chhung zet a khaihlak a; nungchang mawi lo thubuai avanga match hnih hrem tawk mek Argentina first choice goalkeeper Emiliano ‘Dibu’ Martinez hmunruak luahtu Geronimo Rulli chuan first half-ah tha zetin Salomon Rondon goal tur dan sak mah se tlawm tum lo tumruh Venezuela hian na zawkin second half-ah an nawr chhunzawm a, Yeferson Soteldo siamsak atangin Venezuelan striker Rondon chuan an siphurh a sut zui ta tho a ni.
Argentina tlawm hreh insiksawiah an boss Lionel Scaloni cuan hun tawp hma minute nga la awmah Leandro Paredes leh Lautaro Martinez luhtir bawk mah se ruahsur nasa avanga khelmual tuidul lutukah an tum angin World Cup champion an tal na thei bik lo a, Messi hoin Argentina an chak zo lo!
Inkhelh bana an kawmnaah Messi chuan, “Game fuh lo tak a ni. A zawnin vawihnih lek pawh kan in pass thei lo a, khelmuala tui a tam lutuk avangin ball a lir tha thei lo a, khati ang dinhmuna inkhelh kha a harsa ve lulai bawk em a ni,” tiin duh anga an chet theih loh dan a sawichhuak.
Argentina defender Rodrigo De Paul pawhin an team-in an khelh that ber hun tawngbaw tur chuan khelmual dinhmun tha a pawimawh tih a sawi ve bawk.
Hnehna chang zo lo mah se point 19 hum chungin Argentina khan table-ah hma an hruai chhunzawm rih tho a, anmahni hnaihbertu Colimbia lakah point thumin an sang a, pathumna Uruguay nen point liin an la inthlau bawk.
Argentina hian karleh Thawhlehniah Bolivia tum lehin, he mi ni vek hian Venezuela-in Paraguay an luhkhung ve bawk ang.
Nizanah Uruguay leh table mawngphah Peru inkhel result tarlan hman a ni lo.
Chile hnehtu Brazil
Ningani zan khan South American World Cup qualifiers khelh chhunzawm niin, Chile khawpui Santiago-ah Brazil-in 2-1-in mualneitu team an hneh a; inhnehtawk mai tawh tura ngaih an nih hnu minute 89-a team pahnih daidangtu goal kha substitute Luiz Henrique tihluh a ni.
Paraguay laka tlawm tawh Brazil hi qualifiers an khelh hnuhnung vawingaah vawili tlawng an chak lo a; Ningani zanah pawh an talbuai hmasa leh a, tan atanga minute hnihna lekah Felipe Loyola cross atangin Eduardo Vargas chuan home fans lamtir turin goal hmahruai a tauhlut.
An hmahruaina chhunzawm turin Chile hial hun remchang dang hmu chhunzawm zauh zauh mah se an hlawhtling lo zel a; Brazil-in first half hun pekbelhah an siphurh an sut ta zawk a; he match-a mikhual goal hmasa zawk hi dinglam sira tan khawh chunga Savinho ball vawrh phei rahchhuah niin, Igor Jesus chuan national team-a koh a hlawh vawikhatnaah ram tana a goal hmasaber ni zui ta a tauhlut.
Sikhat ve ve thuna an inhnehtawk hnu second half-ah Brazil lamin inkhel an thunun ta a; mahse, mikhual team hian goal thun erawh an harsat chhunzawm leh a, hun tawp hma minute 89-ah Brazilian league leaders leh-a teammate Luiz Henrique chuan box tlang hriam lai atangin World Cup champion ni thei awmchhun tan an mamawh ngawih nawih point thum hlawhchhuahna goal a khung ta a ni.
He result hmang hian South American standing-ah point 13 hum chungin Brazil hian Ningani zan inkhel danga goal awm loa Paraguay inhnehtawkpuitu Ecuador lehpelin palina an luah chho a; an chung chiaha awm Uruguay lakah point hniha hniamin, hmahruaitu Argentina lakah point riat ngawtin an la hnufual a; point nga chauh neiin Chile erawh a mawngphah chung chiahah an thu.
Bolivia chuan goal difference-a Ecuador pha loin parukna an luah a, point khata hniam Venezuela chu pasarihna. Kum 2026 Fifa World Cup hi South American qualifiers-a point hmu sang parukin automatic-in an khel thei dawn a ni.
Messi kir zanah Argentina chakpui zo lo!
