Messi phatsan ve lotu Yamal!
Kawng engkima chungnung zawk Spain laka Argentina an chak loh hnuah Argentina tiropuitu leh he South American team tingaihawmtu Lionel Messi chu New York New Jersey stadium khelmual phul chungah lungngaiin a indawmkun nghiai a.
A ball siamsak leh a goal thun laia a chhang eitu zozaite kha khaw’nge an awm zawh tak tih pawh hriat loha mittui nena a maltlat keuh keuh laiin kum 20 mi a nih laia mihang nausen a lo bual tawh, Spain rawlthar hmalam hun nei eng berte zinga mi rawn ni chho ta Lamine Yamal khan a va pan vang vang a, duat taka kuahin a hlawhchhamnaah a hnem.
Kum 39 mi hian beiseina sang tak nena a thiltih mak hmuh leh tuma fuankhawm Argentina fans lam a hawi chho vang vang a, tuntum zet chu a theihnain a tlin ta lo tih a hriatin a biang tawn tawnah mittui a luang a, a hming hlaa saa so phul bulh bulh thinte hmela beidawnna ang bawk kha great Argentina icon hmelah pawh hmuh tur a awm ve!
Chuti ang boruaka Barcelona number 10 tharin he club number ropui ha thintu Messi lungngai a kuah lai kha khawvelin a thlir a, kum 2007 September thlaa kum Barca star ropui zi chhuak mek Messi leh mihang nausen thla ruk mi lek bualthlenga thla la dun khawvelin a hlut ang bawkin Pathianni zana Messi leh Yamal chetla dun kha khawvelin hmuhnawm a tih leh a rinawm!
Charity calendar atana thla la dun mi pahnihte zinkawng zawh mek chu a inang lo ta hle a; kha nausen kha tunah chuan rawlthar mai ni chungin Europe leh world champion a rawn ni chho ta a, Messi tan erawh a World Cup zinkawng tawpna a nih tawh hmel.
A career tir lam hmang chho mek Lamine Yamal hian kum hnih liamta mai khan final-a England hnehin Spain chu European champion a nihpui tawh a, tunah World Cup trophy lakpui lehin, kum 20 em pawh a tlin hmain international football-a title lian ber ber pahnih a hlawhchhuak hman der tawh a, kum 19 leh ni ruka upa ni chungin World Cup leh Euros hnehtu a ni hman der tawh!
Ram tana competitive match 28 a khelhah Yamal hi a la tlawm lo zawn mek a; major tournament bika game 13 a start-ah hnehna chang fai vek bawkin, European player zinga major tournament starting line up luah chunga 100% win nei rei ber a ni.
Kum 19 mi ve bawk a Spain team-mate Pau Cubarsi nen World Cup final starting line up chang chunga hnehna hlawhchhuak thei palina leh pangana niin, Pele (Brazil 1958), Italy defender Giuseppe Bergomi (1982) leh France forward Kylian Mbappe (2018)-te hnungdawltu an ni.
Messi phatsan ve lotu Yamal!
