World Cup khel tura inbuatsaihna friendly match ah World Champion Argentina chuan Lionel Messi tel lovin Honduras an hneh. Argentina rual hian ram lian Brazil, Germany leh Portugal ten hnehna an chang bawk.
Messi tel lova buai lo Argentina
World champion Argentina hian Kyle Field, Texas-ah Honduras an hmchhawn. Honduras an hmachhawn tum hian an player pawimawh Lionel Messi an chhawr lova, hliam tenau a neih vangin Messi hi bench-ah an thut tluan tir. Messi leh si nghak pawimawh Emiliano Martinez te tel lo mah se Argentina an buai lova, 2-0 in hnehna an chang.
Argentina manager Lionel Scaloni chuan muallaiah a player tha; De Paul, Mac Allister leh Enzo Fernandes te bul a tantir lova. Tlarhnungah Tottenham captain Christian Romero a awltir bawk. Player langsar tak takin mual lai luahlum lo mah se Argentina hian inkhel a thunun hneh viau tho thung a, goal thun theihna hun tha pawh an nei zauh zauh. Inkhel hmuhnawm pangngai takah goal lut a awm theih lawk loh hnuin Argentina in penalty an hlawhchhuak. Penalty hi Lautaro Martinez chuan minute 37-naah ram an a goal 37-na thun.
Argentina hmahruaina goal thuntu Martinez hi manager Scaloni a player duh zawng tak mai a ni a, khelhna hun tha a pe fo thin. Serie A to-scorer hi World Cup 2022-ah khan beisei a phak lova, vanduaithlak takin goal thun theihna hun tha a neih a hlah fo thin. Goal thun a harsat vangin Jullian Alvarez-a’n a nekchhuah phah Copa America 2024-ah erawh top-scorer a ni chho leh ta hial thung. Serie A top-scorer niin Inter Milan a champion pui a. Honduras lakah goal khat a thun bakah assist a nei a, man of the match-ah thlan a ni bawk nen World Cup-ah pawh bul a tan ngei a beiseiawm.
Martinez goal thun hnu hian chawlhlawk hmain goal dang a luh belh thei lo. Chawlhlawk hnu lamah Argentina in goal an thun belh thuai thung. Lautaro Martinez ball khen nalh leh fing tak atangin Giuliano Simeone chuan minute 54-naah an goal hnihna a thun a, an hmahruaina a tizau. Simeone goal thun hnuin goal dang a luh belh thei tawh lova, Argentina in phu takin hnehna an chang.
Tarlan tawh angin Honduras an hmachhawn tum hian Argentina tan Lionel Messi a inlan lo. Friendly match-ah inlan lo mah se Messi hian World Cup-a an match hmasa ber June ni 16-a Algeria an hmachhawn hunah bul a tan ngei a rinawm thung. Si nghak Martinez pawhin Algeria a hmachhawn tura ngaih a ni.
Brazil an chak
Football ram ropui, World Cup-ah vawi nga champion tawh a, champion ngun ber ni mek Brazil in champion an harsat a, beisei an phak lo fo thin. World Cup 2026-ah Neymar hovin an ropuina neih let leh an tum dawn a. Hmana Brazil ropuina kha neih kir leh tumin tan an khawh dawn. Brazil hian World Cup hmaa inkhel an hmachhawn hnuhnungah an khingpui Egypt chu 2-1 in an hneh.
Brazil hian Egypt lakah bul an tan tha viau a, inkhel tan atanga minute 7-na lekah Bruno Guimarães chuan hmahruaina goal a thun nghal. Goal chhuah hma hle mah se Egypt an insiamtha thuai a, minute 11-na lekah Mostafa Zico goal thun hmangin an si phurh an sut nghal. Hma taka goal hnih a luh hnuin goal a luh belh thei lo reng a. Chawlhlawk hnu lam minute 52-naah Brazil tan Endrick chuan hma an hruai nawn lehna goal a thun a, Egypt lakah an chak zui ta a ni.
Inkhel dangah World Cup-a vawi li champion tawh Germany chuan inelna thlengtu USA chu harsa ang reng tak 2-1 in an hneh hram. Inkhel dangah World Cup-ah a vawi khatnana champion tum Portugal pawhin an khingpui Chile chu 2-1 in an hneh ve bawk.
Messi tel lovin Argentina an chak
