Mi 3000 chuang enkawl mekna hmun dintu tan Padma Shri

TNT-in khaw pangaah ‘centre’ an nei a, chungah chuan mi 3470 enkawl mek an ni. Chumi dintu Sangthankima chu Padma Shri dawng tura thlan a ni.
Republic Day lawm nan Padma chawimawina dawng tur hming puan a ni a, Mizoram atangin Sangthankima hi Padma Shri dawng tura thlan zingah a tel. Chawimawina inhlan hun tur hi a la chiang lo a, kum dang ang bawkin Delhi-ah India ram president kut atanga dawng tur an ni.
Padma Shri chawimawina dawng tura thlan Sangthankima hian 1988-ah Thutak Nunpuitu Team (TNT) a din a, TNT hian hmun hrang hranga centre an nei tawh. A hmasa ber chu Aizawla Zuangtui venga Kalvari Hospital hi a ni a, chumi hnuah inzarpharh zelin, Kolasib, Lunglei, Champhai-ahte an din hnuah Myanmar-a Tahana-ah an din bawk.
Heng an hmun enkawl hrang hranga awm zat hi a danglam deuh reng a, tuna an chhinchhiah dan chuan Aizawla Kalvari Hospital-ah mi 1801, Kolasib-a Kalvari Home-ah mi 320, Lunglei-a Lunglei Home-ah mi 740, Champhai-a MZ Home-ah mi 360, Tahan-a Tahan Home-ah mi 240 an enkawl mek.
A thar ber Tahan Home-ah hian Zo hnahthlak ni lo an awm nual a, Buddhist an awm nual. Buddhist an enkawl zingah damna changa Kristian-a inpe tate pawh an awm.
TNT enkawltute sawi danin, Tahan-a an home bul maiah hian Myanmar buai hnuah Myanmar sipai an inchhek a, sipai sorkar paih tumtute nen an inkap fo. An bul maiah an inkap fo chungin vanneihthlak takin an home hi a him a, vawi khat pawh home chhungah bomb a tla a, a puak lo hlauh.
Hmun hrang hranga an hmunte hi rinnain an kalpui a, ei leh in tur leh mamawh tur thil dangte neihna tur chiang sa awm lovin rinnain an nghak thin. Ei tur neih loh lek lek tum te pawh an neih fo thu an sawi a, an nghei hman lo chiah chiah thin tih te an sawi.
Sangthankima hi a hmain Padma Shri chawimawina dawng tura thlan tura chhawp chhuah zingah a lo tel tawh a, mahse “ka thawh chhan a ni lo” tiin a hnar. Tun tumah hian dawng tur hming an puanin a an thlang tih a hre chawp chauh tih thu dawn a ni.
Thu dawn danin, Republic Day hma lawk khan Delhi atangin award dawng tura thlan a nih thu hrilh an awm a, Hindi-a an biak avangin eng award nge tih pawh an hre lo. Chumi hnuah Padma Shri chawimawina dawng tura thlan a nih thu hi chiang zawkin an hre ta a ni.