Mi 61-in thing mistiri zirchhuak
Serchhip district-a PM Vishwakarma hnuaia hmalakna peng pawimawh pakhat – thing mistiri (carpentry) training chhuak mi 61 hnenah certificate Zirtawpni khan hlan a ni.
Hmanpuitu Serchhip bawrhsap Paul L Khuma chuan district 11 zinga training chhuak hnena certificate sem thei hmasa ber an ni chu district mipui, DC office-a thawktute leh Serchhip district-a he scheme kalpuitu Medhavi Foundation thahnemngaihna vang a ni tih a sawi a. PM Vishwakarma hi mipui nawlpui thleng phak hmalakna a ni, tiin, training chhuakte chu tan la chhunzawm zel turin a chah.
Report-a tarlan danin, Serchhip district-a village council zawng zawng chu he scheme hnuaiah hian an inziaklut tawh a, dilna thehluttu mi 2582 awm tawhin, district 11 zingah hma an hruai mek. Dilna lut hi nodal department – Commerce & Industries chuan lo thlifimin, bawrhsap pisa-in a pawmpui hnuah state-ah thehluh leh thin a ni.
Carpentry training hi batch hniha kalpui a ni a. Training chhuak mi 61 zingah hian hmeichhia pakhat a tel.
PM Vishwakarma hnuaiah hian trade 18 a awm a. Kutthemthiamte thiamna belhchhah a, an theihna tihpun sakin, quality tha zawk an siam theihna tura tanpui chu a thiltum a ni. Training chhuak mi 61 hian hmanrua leina tur Rs. 15000 an dawng theuh dawn a. Hei bakah hian zaa 5-a pung, dahkham awm lo loan, cheng nuai 3 thleng an dil thei a ni.
Mi 61-in thing mistiri zirchhuak
