Reuben Lalnunthara Hnamte
Mi hlawhtling han tih hian kan hriat dan leh pawm dan a inang lo viau maithei a ni. Hlawtling nia kan hriat hi mi tam tak chuan rosum leh pai ngah leh lehkhathiam ni te hian kan ngai deuh ber a. In leh lo tha, ram leh huante, kan thilneih hrang hrangte niin kan ngai deuh ber awm e. A dik pawh a dik khat bawk a, mahse, hlawhtling dik tak zawk hi kan hre fuh lo fo thin. Sum leh pai thla tina mumal taka lalut, mahse, in leh nei hauh lo te chu mi rilru nei leh fingah pawh kan chhiar lem lo. Mizote phei chuan mahni in han tih tur awm miah lote phei hi chu famkim lo kan ti a, kan theih ang tawk tawkin kan tuak hram hram thin a. Nu leh pa tam tak pawh hian kan fate an nuamsa lovanga, rual an awt palh hlauvin a sur a sa hnuaiah kan thawkrim hle bawk thin a. Fate pawh awm hman lo leh ngaihsak hman lem lo nu leh pa tam tak an awm a ni. Tin, nu leh pa zingah Taihmak leh neihnun vang pawh ni lem lova chhungkua ngaihsak lo hrim hrim chi hi an awm bawk. Chhungkua nei a fate nei tih inhre miah lo niawm taka awm nu leh pa sawi tur tam tak an awm bawk.
Chuvangin tunlaiah naupang leh thalai zingah chhungkaw awmzia hre lo fe fe, aia upa zah leh awmdan mawi hre lo tak tak, tawngkam thlahdah deuh deuh an awm chawk a ni. Keini mizo ai mah hian vaiho hian aia upate hi an zah zawk emaw chu aw ka ti thin. Vai rama kan kal chuan khawlai zurui hmuh tur an vang hle a, naupang deuhte phei chu aia upate bula zuk leh hmuam tih te hi an hreh khawp mai. Khuti khawpa zu zalen si duh duh a lei maitheih ni si khu zurui hmuh tur an vang khawp mai. Kan ramah erawh thung chuan zuruite hi an pawr a an zak lo zawk emaw tih tur a ni a, hengte hi a chhan pakhat chu chhungkuaah inzirtirna tha a awm loh vang a ni chawk. Vawikhat pawh vai rama ka zin tumin zanah hian vai zurui pakhat hi a rawn bengchheng dawn a, a bula vai awm ho dang khan an beng hrep mai a, an hnawt haw daih. Kan ram nise chu kan invuipui leh luai luai ang a, nu leh pa thenkhat lahin an fate thlavang an hauh na fe maithei. Khawlaia zurui pawr deuh hi chu aia upate hian zilh ngam deuh se chuan khawlaia zurui pawr deuh hmuh tur pawh hi an vang maithei a ni.
Vawikhat pawh Gospel camping an siamnaah ka va kal ve a, ruihhlo ngai pakhat chu thuneitu ten thu a awih loh avang leh camp atanga a chhuah fo avangin an hnawtchhuak a. A nu chuan camping buatsaihtu te a rawn tim hrep mai a, “Camping nan hian pawisa engzatnge ka thawh in hria em” te tiin chapo takin an rawn ankhum hrep mai a ni. A dik tak chuan kan ram thalai sualna chhante pawh hi nu leh pa hian kan zir loh chin tam tak a awm a. Kan fate thlavang kan hauh lutuk leh kan tan lutukte hi kan tisual zawk tih te hi hre ngam ila a tha hle. Nu pakhat ka hriat ve thung chuan a fapa zu ruih hmang tak mai hi a tan duh miah lo va. A thiltihsual avangin khawtlang hruaitu ten an man a, lock up-ah an khung a tah pawh chuan a tlawh duh lova a thlavang a hauh duh miah lo bawk a, a fapa chuan hreawm a ti ngang a niang, a zu in thin a sim phah hmiah zu nia. Kan fate hi kan thawhchhuah zara an nawmsak ai hian anmahni ngei hian thawk chhuak sela a tha ber. Nu leh pa zara lo in la milian ho hi mi laktlak tak an tam lo maithei a ni. Sap hovin an fate an enkawl dante hi chhungkaw pangngai ho chu an ti tha phian. Kum 18 an tlin chuan anmaniin intodelh turin an pen chhuak a, khawvela mi hlawhtling leh hausa hote hi sapho an nih deuh zel hi maw.
Sorkarah a ni emaw, eng hnaah pawh hotu lian leh sâng tak pawh niin mite ngaihah chuan mi hlawhtling tak angin lang mah ila, chhungkua a nawm lova a hlim loh chuan khawvel hi kan hmang nuam lo rawih mai a ni. Mi hausa tak, duh duh eia lei thei pawh ni ila, kan fate an that loh chuan chhungkua a nuam thei lo. Chhungkua hi Pathian din a ni tih hriat hi a pawimawh hle mai a, a dintu duh dan anga awm loh chuan chhungkua a hlawhtling mawh khawp mai. Chhungkuaah hian Pa hi kan lo pawimawh khawp mai a, pa berin Pathian a tih a, a nun dan a dik phawt chuan fate hian an lo zui mai thin. In leh lo tha leh manto nei lo mah ila, car manto emaw, ro thil hlu nei khep khup lo mah ila chhungkua a hlim chuan nu leh pa naupangten nuam an ti. Kan faten inchhung nuam an tih loh chuan an hmabak chu khawlaia vah leh thilsual tih a ni mai. Politics te, khawtlangahte mite fak leh chawimawi hlawh mah ila, chhungkua a hlawtlin loh chuan mi lawhtling tia chhiar theih kan ni meuh dawn em ni? Kohhranahte inhmangin Pathian thu sawi kur dup mah ila, chhungkua a hlim lova a hlawhtlin si loh chuan ava famkim dawn lo em!
Mi hlawhtling tehna chu sum leh pai tam lam aiin, Pathiana rinawmna, chhungkaw hmangaih leh enkawl that, taimakna, harsatna hmachhawn peihna, leh nunphung mawi vawn tlatna kha a ni. Mahni chauh ni lovin, midangte tana malsawmna ni a, chhungkaw tana belhfak nih hi a ni. Lehkhathiam lo, saptawng pawh thiam lo, zirna lamah sang lo nimahsela, a fate an hlim a, an hlawhtlin a, chhungkaw nuam tak an siam chuan nu leh pa hlawhtling an ni. Politics-a mi challang, sorkar emaw a officer nia, sumdawng hausa pawh nise, an fate tihtlak an awm lova, chhungkua a hlawhchham chuan nu leh pa hlawhtling tehnaah an tling tawk lo maithei a ni. Rosum leh pai leh thiamnate hi a pawimawh lo a ni lo; nimahsela, Nu leh Pa hlawhtling tehna atan erawh a tling tawk chiah lo a ni. Nupui pasal la nei lote pawh hian tun atangin engtin nge chhungkaw hlawhtling ka din ang tih hi lo zir hmasak a pawimawh hle. Chhungkaw hlim leh nuam tak siam tumin bei la, tichuan he leiah pawh vanram i tem lawk dawn tihna a ni e.