Middle East-ah Iran-in US hmunhma a tichhe nasa

Middle East-ah Iran-in US
hmunhma a tichhe nasa
Iranian-te beihna avangin Middle East-a US hmunhmate chu a chhe nasa hle tih US-a CBS chuan a tar lang.
Sipaiten thlalak an pek khawm a tihchhuahah radar jet, trailer chhia leh in tam tak chhe sawp hmuh theih a ni a. Hengte hi Saudi Arabia leh Kuwait-a US base leh hmun dang thlalak, a lak hun hriat loh an ni hlawm.
Sipai pakhat chuan, “Heng hi American vantlangin an hriat loh kan hmun chhe nasa takte a ni a. Kan mit ngeiin kan hmu a, kan hmaiah na takin min hnek a ni,” a ti tih CBS chuan a tar lang.
Thlalakte hi Pentagon-a indo thlithlaitu (watchdog)-in Iran-in Middle East-a an hmunhma tam tak an tichhe tawh tih a sawi tuk lawka tihchhuah a ni.
Thlalak pakhatah chuan Prince Sultan Air Force Base, Saudi Arabia-a Boeing E-3 Sentry chu a chanve vel chung a inhawng a, a mei lam thir chu a bung tih a lang.
March thla khan he hmun hi beih nia hriat a ni a. Boeing E-3 Awacs-te hi hmun hla kap thei ralthuamin a kahna lo hmua a bitum chhui thei, hlauhawm pe chhuak hma thei tura duan a ni.
Beih a nih tum hian Iranian-ten air base an beihnaah US mi 12-in hliam an tuar a, pahnih chu an na hle tih US thuneitu pakhat chuan Reuters hnenah a sawi.
Thlalak dang pahnih, a lak ni hriat loh ve ve-ah chuan Kuwait-a Camp Beuhring-a trailer leh puan in anga siam thil dingte chu a chhe darh nasa hle a, mei a khu nasa hle bawk tih a lang.
Thlalak dangah pawh Kuwait thova Camp Arifjan-a in chhawng lia sang chu Iranian-ten an kap chhe bawk tih a lang a. He hmun hi March thla khan a chhia tih puan a ni a, tuna thlalaka mi hi hemi tuma mi hi a ni em tih erawh hriat a ni lo thung.
Thlalak tihchhuah hma lawk hian Pentagon-a watchdog chuan ‘Iranian-ten tuna indona kal mekah hian Kuwait, Bahrain, Qatar, UAE, Saudi Arabia, Iraq, Oman leh Jordan-a US hmunte an kap chhe nasa hle’ tih a lo sawi tawh.
Indona avang hian US chuan $ tluklehdingawn 3.7 a hloh tawh a, June 29 thleng khan $ tluklehdingawn 33.4 a seng tawh nia sawi a ni bawk.
February 28 atanga Israel nena tang duna Iran an beihna kam mekah hian US vantlang leh politic atangin White House chuan titawp tura nawrna a dawng nasa hle.