MIFCO (Mizoram Food & Allied Industries Corporation Limited)-in cheng nuai 14 a hlep thu chuan tun hnaiah chanchinthar a luah a. Hei hi, MIFCO accounts kum thum (2022- 2023, 2023- 2024 leh 2024- 2025) chhung audit atanga a lan dan a ni a; cheng nuai 14 hlep hi 2024- 2025 kumah chauh a ni; a lawmawm tho e.
Tun hma atang tawhin, Public Sector Undertakings MIFCO, MAMCO, ZOHANDCO leh ZIDCO te hi, hlep chu sawi loh, thawktu hlawh pawh thawk chhuak mang lo anga sawi an ni thin a, “thawk chhuak” tura beisei an nih laiin “khawh-ral-tu” an ni hlauh thung.
Nikuma Committee on Public Sector Undertakings-in House-a report a thehluhah khan, MIFCO leh MAMCO insuihfin (merging) rawtna an lo thlen tawh a. Hetiang bawk hian MAMCO leh ZIDCO pawh suihfin a, heng merged Corporation te hi Finance Department hnuaia dah ni se, tih an rawt nghal bawk a. Hei bakah hian, Corporation suihfin te enkawltu (Chairman leh Managing Director) tur hi political ground atanga inruat lova, mithiam leh mi tling, tawnhriat nei tha zawng tura Search-cum-Selection Committee din te pawh an rawt bawk a nih kha.
Tuna hlep siamna kum hi 2024-25 a nih avangin, Committee on PSU ten rawtna an thlen hnua hlep hi lo awm phah ta a ni hran lo; chutih rualin, Committee hian ngun takin Mizoram PSU te hi an zir chiang a, state danga an kalpui dante pawh an zir chiang bawk a, chuta tanga tha ber tur nia an hriat chu House-ah an report ta kha a ni a. Hei, thla ruk a liam leh ta a ni a, khangte kha engtin nge bawhzui a nih a, hmalakna rah eng nge hmuh tur awm tih te pawh hi mipui lam hian hriat zui an chak ve ngeiin a rinawm.
Committee on PSU-in Corporation enkawltu tur ruat/thlan chungchangah, political ground atanga inruat loh ni se tia rawtna an thlen atang hian, tunhma atang tawhin Corporation kaihruaitu tur ruat chungchangah, a thiam leh thei, tling leh tlak, tawnhriat nei qualified Chairman/Managing Director ruat an lo ni ngai meuh lo a ni ang tih a rin theih awm e.
Hei hi a pawimawh hle a, Corporation enkawl tur phei chuan ‘tawnhriat nei’ ni satliah mai lovin, ‘tawnhriat ngah tak’ ni deuh kher thei se a duhawm lehzual. Tunhma khan PSU enkawltute kha ‘qualified’ an lo nih thin loh vang nge, a hlawhtlin theih loh? tih hi zawhna awm thei a ni.
Eng pawh ni se, Corporation hrang hrang ten hmalakna thar duhawm tak tak an kalpui chho mek a, hei hi hriat leh hmuh a nuam a, din an nih chhan ang ngeia hlep tha tak siam zel turin kan PSU te hian tan han la sauh sauh se a tha ang e.
MIFCO hlep nuai 14
