Rev Dr Ramengliana
Kum 4 dana thleng World Cup Football an tan leh ta. Khawvel mite rilru a ruala hip khawm thei ber pakhat a ni hial awm e. Mizote ngei pawhin kan tuipui hlawm a, titi titamtu ber a ni leh dawn chiang. Kum eng emaw zah hnua lo thleng a nih thin avang pawh hian ngaihhlut chu a phu ve tho, a leh pek kan thleng pha ang em tih kan hre hauh si lo va!
Thil nihphung pangngai ve mai anga kan ngaih liam mai lai hian han chhut chian deuhva mihring nihphung danglamzia leh makzia, puar leh fanna ni miah si lovin kan nunah hmun a chan len theihzia hi a lang chiang hle a. Khawvel miten heti taka nawmna kan zawng a, intihhlimte kan han tum nasa mai hi chuan rorelna nia insawifiah nasat a ngai ve ngawt dawnin ka hre thin.
Fiamthu film hmuhnawm zet mai Mr Bones tih, tunhma deuhva an siamah khan tribal hnam tu tlawh pawh mang lote zinga sei lian a changtupa kha khawpuiah a kal thut mai a, a thil tawn leh hmuh dan a nuihzatthlakin a entute min tihlim hlawm hle a nih kha. Khatah khan stadium pakhatah a va kal a, mi sang tam takin inkhel an lo en thup mai a.
Ani chuan eng nge maw an tih hlawm tia a zawh chuan Baseball khel an en tih a lo hrilh a, khatia mi ball vawm leh vuak mai mai nilenga an en peih kha mak zu ti zawk em em a! Nuihzatthlak viau mah se han ngaihtuah chian chuan mak a ti viau mai kha a mak vak lo zawk lo maw? World Cup football te pawh hi ropuiin hlimpui viau mah ila a tawp khawkah chuan patling 20 rualin ball mum an inchuh a ni ve mai chu a nia!
Kei hi Lionel Messi fan ruhkawl pakhat ka nia. A chet that deuh hian hlimna danglam tak min pe thin. A chanchin te hi hriat nuam ka ti em em mai a. Facebook, Twitter, Youtube vela mi zawng zawng hi chu ka vaihma vek a ni ber mai. A chawimawi thiamten an han fak tak tak te hi chu ngaihnawm ka ti ngawih ngawih thin. Ani aia Ronaldo an han dah sang zawk thei te hi mak ka ti em em thin a nih chu!
Kum 2022 -a World Cup no mawi an han chawi hnu te khan kar 2 chhung chu TV-ah Messi hlir Messi hlir ka en a, an chawimawina thu leh hlate kha ka kham lo a ni ber e. A chang phei chuan Messia tak tak zawk aiin ka buaipui nasa mahin ka hre hial a. Ka fanu pawhin ‘Apa chu, Messi hi i atchilh mah mahin ka hria’ min ti hial a nih kha!
Chuti khawp chuan a fan ka nihna boruak hi sang mah se a tawpkhawkah chuan Messi thiam chu ‘ball chawh leh pet’ a ni ve deuh mai tih erawh ka hre thiam a. A tawpna a va ho si em! Ball mum an thunun vel hi thiam viau lo sela chuan he Argentine pa lian em em bik lo hi hringnunah eng teh ruai chu a nih bik ka ring lem lo. Hollywood lam emaw UFC lam emaw han lut dawn se beisei a sang bik lo em mai.
Hetia ka sawi hi Messi sawi nep tumna a ni miah lo a. Footballah rau rau chuan nu chhul chhuakah ani tluka ropui an la awm lo tih hi ka pawm dan a ni. Football piah lamah pawh a hringnun hi entawn tlak a tam hle tih pawh ka hre chhuak ve zel a. Larna a phurh zawh em em dan te, inngaitlawm taka thu a sawi thin dan te, Pathian hming a lam leh tlat thin te hi ngaihsan loh hleitheih pawh a ni lo. Lehlamah chuan mi nuai tel hlimna petu leh lawmna thawk chhuaktu a nih tih pawh a lang reng bawk a.
Chutih laia zawhna pawimawh angreng tak chu ‘Eng vangin nge billionaire hial a lo nih theih tak?’ tih hi a ni a. Chu chu ei tur buh a thlawh chhuah hnem vang a ni lo va, mi dang a tanpui tam vang emaw ral a kah hnem vang a ni hauh lo. Ball chawh leh pet goal a thiam vang mai chauh a ni. Mi hmuhnawm tih zawng tak a thiam a, mi intihhlimna hmanraw pawimawh tak a lo ni ta a. Chu chu a hlawkpui ta em em a ni ber e.
Hei tak hi rilru hmang thiamtute ngaihtuahna khawrhtu tur chu a lo ni ta a. Messi te, Ronaldo te neihnun em em chhan chu min ‘entertain’ vang a ni a. An hlimna leh nawmna tur chuan miin insen an hreh hauh lo va, chumi tling khawm chu an hausakpui ta a ni. Chu chu sportsperson dang te, film star te dinhmun a ni. An thil thiam hi miten tuipui lo se hringnunah tangkaina fawr em em an nei bik hauh lovang.
Chumiah tak chuan he khawvel mihringten mahni intihhlim kan buaipui nasatzia a lo lang ta chiah a. Tun World Cup final ticket man hi seat khatah US Dollar 10,000/- hial ni dawnin an sawi, chu chu India pawisain Rs. 10,00,000/- vel lawih a ni. He khawvel hmun tin maia ni tin chaw khawp kham nei pha lo tamzia ngaihtuah chuan zahthlak zawk a ni. Intihhlimna hian min va kaihruai nasa tehreng em!
World Cup leh mihring intihhlim hrim hrim do anga min ngaih mai a hlauhawm ta hle mai. Chuti chu ka ni hauh si lo. Ka khawrh chhuah tum zawk chu entertainment-in mihringte min hnehzia leh mahni intihhlim ringawt tum hi nun dan tha a ni ber lo va, Kristian nun tha nen phei chuan a inhlat viau awm e, tih a ni. Sports, Music, Films, leh thil dang dang kan buaipui tur chin tawk a awm ang. Vawiinah hian Isua hi kan zingah lo leng ta se sawi tur a ngah ve awm mang e, tih vel a ni.
Intihhlimna leh thil tak tak thliar hrang thiamtu chu mi fing a ni ngei ang a. Entertainment khawvel hi mi tam tak tan eizawnna te pawh a ni thei daih a, chutiang a lo nih pawhin mite in-entertain vang mai mai a ni tho ang. Thalai thenkhat dinhmun siam mek tur lahin an nih tur ang nih phak loh phah nan an lo hmang thul. Nu leh pa thenkhatin an fa naupang te te tihlar an lo tum phet bawk nen. Hetiang World Cup boruak na takah hian intihhlimna thil leh thil tak tak thliar hrang thiam pawimawhzia kan han sawi thar lawk a ni e.