Hmun thenkhatah mimal dodalna avang leh sawrkar department pahnih inremsiam theih loh avangin four lane siam hna an la tan thei lo tih NHIDCL (National Highways & Infrastructure Development Corporation Limited) hotute chuan an sawi.
Larsap Dr Hari Babu Kambhampati chuan Ningani khan NHIDCL Regional office Aizawl hotute chu Raj Bhavan-ah a kawm a. Mizorama national highway siam hna hmun 8-a an thawh chu powerpoint presentation hmanga thlirho niin, NHIDCL hotute hian kawngpui pawimawh tak Vairengte – Sairang leh hmundanga hna thawh theih a nih loh chhan an sawifiah bawk.
NHIDCL hotuten kawng siam hna hmun thenkhatah mimal hmalakna leh dodalna avanga hna a khaihlak thin thu an sawi a. An harsatna lian ber erawh kawng laihna tur ruahman chungchangah sawrkar department pahnih inremsiam theih loh vang a ni tih an sawi.
Larsap chuan NHIDCL chu beidawng mai loin, Mizoram tana hmasawnna ruhrel pawimawh hmasa bera chhal theih, NH kawngpui laih zau leh NH kawngpui siam hna thawh a nih theih nan an harsatna tawh chu chinfel dan zawng zel turin a chah a. Hma lak chhunzawm dan tur sawipuiin, amah pawhin ministry lamah a theih dana umzui a tum tih a sawi.
“National highway hi Mizoram tana a pawimawh zia mipui nawlpui chuan kan hre vek tawh a. Hetihlaia NH zingah pawh Mizoram tana nunna hnar tia chhal theih Vairengte – Sairang kawngpui 4-lane a siam hna a thawh theih loh tawp hi a pawi a. He kawngpui hi a tlang rual rualin, Mizoramah nitina kan khawsakna atan sum senso nasa takin a tlem phah dawn a, bungraw lei man nasa takin a tlem phah bakah kawng hrang hrangin hmasawnna a thlen thei dawn a ni,” a ti. Department pahnih pawh an inkara chinfel tur awmte chinfel tumin theihtawp an chhuah a ngai tih a sawi a ni.
NHIDCL hian Mizorama project 8 a thawh mek zing:
8 NH-6 Dulte – Champhai chu an zo tawh a; Seling – Dulte chu zaa 95 zawh a ni.
8 Aizawl – Tuipang (NH -54) chu zaa 91 thawh zawh tawh niin, kumin December hian zawh hman beisei a ni.
8 Lunglei – Tlabung ( NH-302) zaa 43 zawh tawh a ni.
8 Keifang – Tuival (NH -102B) chu zaa 56 zawh niin June 2025 a zawh fel tum a ni.
8 Zorinpui – Longmasu (NH-502 A) chu February 2023 khan thawh tura peihfel a nih laiin, land acquisition leh forest clearance fel lo vangin a la thawh theih loh.
8 Vairengte – Sairang (NH -306 & 6) four lane chu kawng laihna tur ram a fel thei lo.
8 Aizawl Bypass (NH-6) Sairang leh Aizawl inkalpawhna tur pawh kawng laihna tur ram a la fel hleithei lo.