Ningani zan khan UEFA Champions League semi-final thawh khatna khelh chhunzawm a ni a. Riyadh Air Metropolitano-a inkhel hmuhnawm takah mualneitu Atletico Madrid leh an mikhual Arsenal te 1-1 in an inhnehtawk. Mimualah chak zo lo mah se an muala inlan zui leh tur an nih vangin Arsenal in final luh theihna hun tha tak an la nei.
Thawhleh zana semi-final hmasa zawkah champion lai Paris St-Germain leh German champion Bayern Munich ten open play khelin inkhel hmuhnawm bik an lantir. Champions League semi-final match khata goal 9 ngawt luhna inkhel, UCL semi-final hmuhnawm ber pawla sawi a thlen hnu lawkah Atletico Madrid leh Arsenal te inveng tawn reng renga tan khawh kan hmu chhunzawm a. Atletico Madrid leh Arsenal te inkhel hi inkhel hmuhnawm tak tia sawi tur ni lo mah se inkhel awmze nei, game plan mumal tak erawh a ni thung.
Champions League leh Spanish Copa del Rey atanga Barcelona hnawtchhuaktu Atletico Madrid hian League round ah 4-0 ngawta an hneh loh tawh Arsenal lakah fimkhur takin an inlan a, an mualah tlawm an tum lo. Manager tawnhriat ngah Diego Simeone chuan Arsenal hlauhawmzia a hrechiang a, an tlarhnung tiphut chunga goal thun tumin ruahmanna a siam. Arsenal in ball an chanin an tlarhnung an veng thuai a, nawr let thut thei turin an forward te an inring reng a, hmunawl an zawng reng bawk. Tlarhnung phui tak Arsenal pawh an fimkhur a, an khingpuite an nawr bawrh bawrh duh bik lo. Team pahnihte hian an tlarhnung ven an ngai pawimawh ve ve.
Inkhel inbuktawk takah goal lut a awm theih loh reng hnuin chawlhlawk dawn hnaihah Arsenal an vannei ta nge nge a, penalty an hlawhchhuah. Viktor Gyokeres chuan a hlawhchhuah penalty chu kawh zetin a pet goal a, minute 44-naah hmahruaina goal a thun. Gyoreres hian Arsenal tan penalty a pet zawng zawngah a la khung vek a, penalty ah bik hnuhma tha tak a nei. Gyokeres goal thun hmangin Gunners hian 1-0 a hmahruai chungin chawlhlawk an hmang.
Si an phurh tawh viau vangin Atletico Madrid tan inven ngawt theih a ni tawh lova, chawlhlawk hnu lamah goal thun ngei tumin tan an khawh. Na taka an mikhualte nawrin Arsenal hi an nawr buai viau nghe nghe. Second half tan tirh lamah Atletico Madrid hian penalty an hmu. Ben White handball vanga penalty an hmuh chu khel tha tak Julian Alvarez chuan minute 56-naah chiang zetin a pet goal a, an si phurh a sut. Arsenal ngei pawhin lak tuma an hel mek Alvarez hi a khel tha zui viau a, hliam vangin a khel tluan thei lo thung. A hliam hi a nat lutuk loh beisei a ni a, second leg-ah Arsenal a hmachhawn leh theih a beiseiawm.
Goal khat ve ve an thun hnuin inkhel a hmuhnawm zui viau a, goal thun tumin an innawr tawn nasa hle. Hun tawp dawn hnaiah Arsenal hian Eze hmangin penalty a hmu nawn leh. VAR rawn a nih hnuin penalty hi sut a ni thung a, he thutlukna hian Arsenal a tilawm lo hle. Arsenal manager Mikel Arteta chuan Ben White hand-ball vanga penalty an chawi chu EPL-ah chuan penalty a nih loh tawp thu a sawi a. A tawpa penalty an hmuh tak loh erawh penalty ngei tur a nih thu a sawi ve thung.
1-1 a inhnehtawk mek Atletico leh Arsenal te hi kar leh khian Emirates Stadium-ah an inkhel leh ang.
Mimualah Arsenal an chak zo lo
