Enchhin loa ringtawk a, an kuta sawrkarna pe turin Mizoram mipui a ngen tih Congress president Lalsawta chuan a sawi.
Aizawl District Congress Committee (ADCC) leh Operation E-Roll hotute bultumin Thawhlehni khan ‘Aizawl City Congress Operation E-Roll Training & Briefing’ hman a ni a. He hun hmanpuitu MPCC president chuan, amah leh a thawhpuiten eirukna do turin Mizoram mipui chu sawrkar tha siampui ngei an tum a, eirukna do a har loh zia an hrechiang a, an ti thei tih a sawi.
“Kan sawi fo thin ‘Tang Puihna’ hmangin ram tha kan siam anga, tang taka hnathawkte kan pui ang; tan ngaihna hre lo khawpa harsate kan pui anga, kan ramah hian mirethei leh hausa inkar tizim a, ram tha siam turin theihtawp kan chhuah dawn a ni,” a ti.
MLA inthlanpuiah Congress party a sawrkar loh chuan BJP thawhpuituten sawrkar an siam leh a ngai dawn tih Lalsawta hian sawiin, “BJP thawhpui ve ngai lo tur Congress party hian sawrkar tha kan siam a ngai a ni,” a ti.
MPCC vice president Lal Thanzara chuan Kristianna tih dal tumtu BJP chu central-a an lal reng chuan kan ram pawh a tluchhe thuai dawn tia sawiin, “Central-a BJP a sawrkar reng a, kan ramah BJP thawptu MNF emaw ZPM emaw an sawrkar chuan ram leh hnam tan a him lo a. Mipuiin ka ram leh hnam a him a, India ram pumah Kristianten sakhaw zalenna kan neih theihna turin Congress party thlawp turin Mizoram mipui ka sawm a ni,” a ti.
Min enchhin loin min ringtawk rawh u – Lalsawta
