Mizoram New Secretariat – MINECO-ah sawrkar hnathawk zinga an fasente enkawlpuina tur hmun PALNA Anganwadi -cum- Crèche chu Social Welfare & Women and Child Development minister Lalrinpuii chuan Thawhtanni khan a hawng.
Secretariat-a hnathawktu nu leh pa, a bikin hmeichhe hnathawkten rilru ngaihngam tak leh hna leh chhungkaw enkawl kawp dan tha zawk nei chunga sawrkar hna an thawh theihnan he hmun hi siam a ni tih minister hian a sawi a. Kum 6 hnuailam naupangte chu an taksa leh rilru nasa taka a than lai a nih avangin uluk taka enkawl an ngai, tiin, he crèche kaltlang hian naupangte hriselna, ei leh in leh an hmasawnna hrang hrang chhinchhiah zui zel a ni dawn tih a sawi a. He hmun hian nu hnathawktute phurrit a chhawk ngei a ring tih a sawi a ni.
He hmalakna hlawhtlinnana thawktute chungah lawmthu sawiin, he crèche hi Mizorama department dang tan pawh entawn tlak a nih a beisei thu a sawi a. Ram hmasawnna tak tak thleng tur chuan naupang leh hmeichhiate dinhmun chawikan leh ngaihsak thiam a pawimawh hle tih a sawi bawk.
WCD director Zoramthangi Chhangte chuan, PALNA Anganwadi -cum- Crèche scheme hi kum 2022 atanga Ministry of Women & Child Development (MoWCD) chuan Mission Shakti (Women Empowerment) hnuaia hnathawktu hmeichhiate tana a duan thar a ni a. The Maternity Benefit Act 2017 angin hnathawktu mi 50 aia tam awmna hmunah crèche facility neih ngei tur a nih angin, MoWCD operational guidelines zulzuiin he hmun hi kalpui a ni dawn tih a sawi. He hmun hi naupang kum 6 hnuailam enkawlna tura duan a ni a, Anganwadi Centre hnai ber nena thlunzawm a nih angin naupangten nutrition, health check-up leh chaw tha an dawn vek tur thu a sawi a ni.
Director chuan Secretariat PALNA Crèche hi uluk taka duan a ni tih sawiin, enkawltu hran Management Committee siam a ni a, kalphung mumal tak nei nghal turin circular chhuah a ni tawh tih a sawi a ni.
MINECO-ah sawrkar hnathawk fa neite enkawl sakna tur siam
